പാരീസ്: പുരുഷ ഹോക്കിയില്‍ ഭാരതത്തിന് തോല്‍വി. നിലവിലെ സ്വര്‍ണമെഡല്‍ ജേതാവായ ബെല്‍ജിയത്തോടാണ് ഭാരതം പരാജയപ്പെട്ടത്. ഗ്രൂപ്പ് ബിയില്‍ നടന്ന മത്സരത്തില്‍ ഒന്നിനെതിരെ രണ്ട് ഗോളുകള്‍ക്കായിരുന്നു പരാജയം. ആദ്യം മുന്നിട്ടുനിന്ന ശേഷമായിരുന്നു ഭാരതം തോല്‍വി വഴങ്ങിയത്.
തുടക്കം മുതല്‍ ഇരുടീമുകളും വാശിയേറിയ പോരാട്ടം നടത്തിയെങ്കിലും ആദ്യ ക്വാര്‍ട്ടറില്‍ ഗോള്‍ വിട്ടുനിന്നു. എന്നാല്‍ രണ്ടാം ക്വാര്‍ട്ടര്‍ തുടങ്ങി അധികം കഴിയും മുന്‍പ് ഭാരതം ലീഡ് നേടി. 18-ാം മിനിറ്റില്‍ അഭിഷേകാണ് ബെല്‍ജിയം വല കുലുക്കിയത്. ഇടവേളയ്‌ക്ക് പിരിയുമ്പോള്‍ ഭാരതം 1-0ന് മുന്നിട്ടുനിന്നു.
ഇടവേളയ്‌ക്കുശേഷം കളി തുടങ്ങി മൂന്ന് മിനിറ്റായപ്പോള്‍ ബെല്‍ജിയം സമനില ഗോള്‍ നേടി. മുപ്പത്തിമൂന്നാം മിനിറ്റില്‍ തിബു സ്റ്റോക്ബ്രോക്സാണ് ലക്ഷ്യം കണ്ടത്. പിന്നാലെ 44-ാം മിനിറ്റില്‍ ബെല്‍ജിയം വിജയഗോളും സ്വന്തമാക്കി. പെനാല്‍റ്റി കോര്‍ണറില്‍ നിന്ന് ജോണ്‍ ഡൊഹ്മെനാണ് ഗോളടിച്ചത്. ബെല്‍ജിയത്തിന്റെ പല മുന്നേറ്റങ്ങളും ഭാരത ഗോളി പി.ആര്‍. ശ്രീജേഷിന്റെ മിന്നുന്ന പ്രകടനത്തില്‍ വിഫലമാവുകയായിരുന്നു. കളി അവസാനിക്കുന്നതിന് രണ്ട് മിനിറ്റ് മുന്‍പ് ഭാരതത്തിന് ലഭിച്ച പെനാല്‍റ്റി കോര്‍ണര്‍ ഗോളാക്കിമാറ്റാന്‍ ഹര്‍മന്‍പ്രീത് സിങ്ങിന് കഴിഞ്ഞില്ല. ഇതോടെ ഭാരതം തോല്‍വി നേരിട്ടു. ഇന്ന് ഓസ്ട്രേലിയക്കെതിരെയാണ് ഭാരതത്തിന്റെ അവസാന ഗ്രൂപ്പ് മത്സരം.
പ്രതികരിക്കാൻ ഇവിടെ എഴുതുക: