വയനാട്ടിലെ ദുരന്തത്തിന് ഉത്തരവാദി കേരള സർക്കാർ; പിണറായി വിജയൻ്റേത് ഈദി അമീനെ പോലും തോൽപ്പിക്കുന്ന ക്രൂരത: സന്ദീപ് വാചസ്പതി

തിരുവനന്തപുരം: മുന്നറിയിപ്പ് നൽകിയിട്ടും പിടിപ്പുകേട് മൂലം ഇരുന്നൂറോളം നിരപരാധികളെ കുരുതി കൊടുത്തതിന്റെ ഉത്തരവാദിത്തം കേരള സർക്കാരിനാണെന്ന് ബിജെപി വക്താവ് സന്ദീപ് വാചസ്പതി. ദുരന്തങ്ങൾ ഉണ്ടാകുന്നതിന് 7 ദിവസം മുമ്പ് മുന്നറിയിപ്പ് നൽകാൻ കഴിവുള്ള 4 രാജ്യങ്ങളിൽ ഒന്നാണ് ഭാരതം. ലക്ഷക്കണക്കിന് കോടി രൂപയും പ്രതിഭാശാലികളായ അസംഖ്യം ശാസ്ത്രജ്ഞൻമാരുടെ തപസ്സിന്റെയും ഫലമാണ് ഈ നേട്ടം. ഇത് അട്ടിമറിക്കുകയാണ് പിണറായി സർക്കാർ ചെയ്തതെന്നും അദ്ദേഹം കുറ്റപ്പെടുത്തി.

സ്വന്തം ജനതയോട് അതി ക്രൂരമായി പെരുമാറിയ ഈദി അമീനെ പോലും തോൽപ്പിക്കുന്ന ക്രൂരതയാണ് പിണറായി വിജയൻ മലയാളികളോട് ചെയ്തത്. ദുരന്ത നേതൃത്വത്തെ തിരിച്ചറിയാനുള്ള രാഷ്‌ട്രീയ വിവേചനം മലയാളികൾക്ക് ഉണ്ടാകാത്തിടത്തോളം ഇത്തരം ദുരന്തങ്ങൾ ആവർത്തിച്ചു കൊണ്ടേയിരിക്കും. നിരപരാധികൾ ഇരകളാകുമെന്നും തന്റെ ഫേസ്ബുക്ക് പേജിൽ സന്ദീപ് വാചസ്പതി പറഞ്ഞു.

ഫേസ്ബുക്ക് പോസ്റ്റിന്റെ പൂർണരൂപം:
ദുരന്ത മുഖത്ത് രാഷ്‌ട്രീയം പാടില്ല. പക്ഷേ ദുരന്തം രാഷ്‌ട്രീയ നേതൃത്വത്തിന്റെ പിടിപ്പുകേട് മൂലമാകുമ്പോൾ എന്ത് ചെയ്യണം?. കേരളത്തിൽ ഉരുൾപൊട്ടൽ ഉണ്ടാകുമെന്ന് ജൂലൈ 23 ന് തന്നെ മുന്നറിയിപ്പ് നൽകിയതാണെന്ന് കേന്ദ്ര ആഭ്യന്തര മന്ത്രി അമിത് ഷാ ഇന്ന് വെളിപ്പെടുത്തി. മാത്രവുമല്ല ദേശീയ ദുരന്ത നിവാരണ സേനയുടെ 9 സംഘങ്ങളെ മുൻകൂറായി കേരളത്തിലേക്ക് അയക്കുകയും ചെയ്തിരുന്നു. എന്നാൽ എന്ത് നടപടിയാണ് പിണറായി സർക്കാർ സ്വീകരിച്ചത്? ഇരുന്നൂറോളം നിരപരാധികളെ കുരുതി കൊടുത്തതിന്റെ ഉത്തരവാദിത്തം കേരള സർക്കാരിനാണ്. ആയിരക്കണക്കിന് നിസ്സഹായരായ മനുഷ്യരുടെ സർവ്വവും ഒരു നിമിഷം കൊണ്ടാണ് ഇല്ലാതായത്.

രാജ്യം നേടിയ ശാസ്ത്ര പുരോഗതിയുടെ നേട്ടം ഇന്നാട്ടിലെ ജനങ്ങൾക്ക് അവകാശപ്പെട്ടതാണ്. ഇത്തരം ദുരന്തങ്ങൾ ഉണ്ടാകുന്നതിന് 7 ദിവസം മുമ്പ് മുന്നറിയിപ്പ് നൽകാൻ കഴിവുള്ള 4 രാജ്യങ്ങളിൽ ഒന്നാണ് ഭാരതം. ലക്ഷക്കണക്കിന് കോടി രൂപയും പ്രതിഭാശാലികളായ അസംഖ്യം ശാസ്ത്രജ്ഞൻമാരുടെ തപസ്സിന്റെയും ഫലമാണ് ഈ നേട്ടം. ഇത് അട്ടിമറിക്കുകയാണ് പിണറായി സർക്കാർ ചെയ്തത്. നൂറു കണക്കിന് മനുഷ്യരുടെ കൊലപാതകത്തിന് നേതൃത്വം നൽകിയ പിണറായി വിജയൻ രാജി വെക്കണം. സ്വന്തം ജനതയോട് അതി ക്രൂരമായി പെരുമാറിയ ഈദി അമീനെ പോലും തോൽപ്പിക്കുന്ന ക്രൂരതയാണ് പിണറായി വിജയൻ മലയാളികളോട് ചെയ്തത്. ദുരന്ത നേതൃത്വത്തെ തിരിച്ചറിയാനുള്ള രാഷ്‌ട്രീയ വിവേചനം മലയാളികൾക്ക് ഉണ്ടാകാത്തിടത്തോളം ഇത്തരം ദുരന്തങ്ങൾ ആവർത്തിച്ചു കൊണ്ടേയിരിക്കും. നിരപരാധികൾ ഇരകളാകും.