ടോക്കിയോ: ക്വാഡ് ഉച്ചകോടിയില് പങ്കെടുക്കാനായി ജപ്പാനിലെത്തിയ വിദേശകാര്യമന്ത്രി എസ്. ജയശങ്കര് അമേരിക്കന് വിദേശകാര്യ സെക്രട്ടറി ആന്റണി ബ്ലിങ്കനുമായി കൂടിക്കാഴ്ച നടത്തി. ലോക രാജ്യങ്ങള് നേരിടുന്ന വെല്ലുവിളികളെ കുറിച്ചും ആശങ്കകളെ കുറിച്ചും ഇരുനേതാക്കളും ചര്ച്ച ചെയ്തു. ഭാരതവും യുഎസും തമ്മിലുള്ള ഉഭയകക്ഷി ബന്ധം ശക്തമാക്കുന്നത് കേന്ദ്രീകരിച്ചായിരുന്നു നേതാക്കളുടെ ചര്ച്ചയെന്നാണ് വിവരം. സാമ്പത്തിക, പ്രതിരോധ, വ്യാപാര വിഷയങ്ങളെക്കുറിച്ചും വിപുലമായ ചര്ച്ചകള് നടന്നു. ആന്റണി ബ്ലിങ്കനെ കാണാന് സാധിച്ചതില് സന്തോഷമുണ്ടെന്നും ആഗോള, പ്രാദേശിക വിഷയങ്ങളെ കുറിച്ച് ചര്ച്ച നടത്തിയെന്നും കൂടിക്കാഴ്ചക്ക് ശേഷം ജയശങ്കര് എക്സില് കുറിച്ചു.
കഴിഞ്ഞ ദിവസമാണ് ക്വാഡ് വിദേശകാര്യ മന്ത്രിമാരുടെ യോഗത്തില് പങ്കെടുക്കുന്നതിനായി ജയശങ്കര് ലാവോസില് നിന്ന് ജപ്പാനിലെത്തിയത്. ദ്വിദിന സന്ദര്ശനത്തിന് ടോക്കിയോയിലെത്തിയ ജയശങ്കറെ ജപ്പാനിലെ ഭാരത അംബാസഡര് സിബി ജോര്ജ്ജിന്റെ നേതൃത്വത്തില് സ്വീകരിച്ചു.
ടോക്കിയോയിലെ എഡോഗവാനില് മഹാത്മഗാന്ധിയുടെ പ്രതിമയുടെ അനാച്ഛാദനവും അദ്ദേഹം നിര്വഹിച്ചു. ഭാരതം, ജപ്പാന്, യുഎസ്, ഓസ്ട്രേലിയ എന്നീ രാജ്യങ്ങളിലെ വിദേശകാര്യ മന്ത്രിമാരാണ് ക്വാഡ് യോഗത്തില് പങ്കെടുക്കുന്നത്.
