തൃശൂര്: ജില്ലയില് മിന്നല് ചുഴലി നാശം വിതച്ചു. തിങ്കളാഴ്ച ഉച്ചയോടു കൂടിയാണ് ശക്തമായ മഴയോട് കൂടി മിന്നല് ചുഴലി ഉണ്ടായത്.
കനത്ത കാറ്റില് എരുമപ്പെട്ടിയില് വൈദ്യുത പോസ്റ്റുകള് നിലംപൊത്തി. ചാവക്കാട് പാപ്പാളിയിലും കോലഴിയിലും മറ്റ് വിവിധയിടങ്ങളിലും കാറ്റില് വ്യാപക നഷ്ടമാണുണ്ടായത്. കോലഴിയില് പൂവണി ബസ് കാത്തിരിപ്പ് കേന്ദ്രത്തിനു മുകളില് തെങ്ങ് വീണു.
അയ്യന്തോള് റോഡില് രണ്ട് വലിയ മാവുകള് ഒടിഞ്ഞു വീണു.സമീപത്തുണ്ടായിരുന്ന തട്ടുകടക്കാര് തലനാരിഴയ്ക്കാണ് രക്ഷപ്പെട്ടത്. കാഞ്ഞാണിയില് മിന്നല് ചുഴലിയില് തെങ്ങിന് പട്ട വന്നിടിച്ച് യാത്രക്കാരുമായി സഞ്ചരിച്ച ബസിന്റെ മുന്വശത്തെ ചില്ല് തകര്ന്നു.
അതിരപ്പിള്ളിയില് മരച്ചില്ല ഒടിഞ്ഞു വീണ് കോഴിക്കോട് സ്വദേശി വിനോദസഞ്ചാരി സിജു പി വിന്സെന്റിന് പരിക്കേറ്റു. കുന്നംകുളത്ത് കാണിപ്പയൂര് സര്വീസ് സഹകരണ ബാങ്കിന് സമീപം മരം കടപുഴകി വൈദ്യുതി പോസ്റ്റ് തകര്ന്നു. ശക്തമായ കാറ്റില് മുനക്കക്കടവ് അഴിമുഖത്ത് മത്സ്യബന്ധനവള്ളം അപകടത്തില്പെട്ടു. തൊഴിലാളികള് തലനാരിഴയ്ക്ക് രക്ഷപ്പെട്ടു.
