പ്രമേയം അനുവദിച്ചില്ല: കണ്ണൂർ യൂണിവേഴ്സിറ്റി സെനറ്റ് യോഗത്തിൽ ഇടതുപക്ഷത്തിന് തിരിച്ചടി

കണ്ണൂർ: കണ്ണൂർ യൂണിവേഴ്സിറ്റി വിസി നിയമനത്തിനുള്ള സേർച്ച്‌ കമ്മിറ്റിയിലേയ്‌ക്ക് സെനറ്റിന്റെ പ്രതിനിധിയെ തിരഞ്ഞെടുക്കാനുള്ള സെനറ്റ് യോഗത്തിലെ അജണ്ട ഒഴിവാക്കണമെന്ന് ആവശ്യപ്പെട്ടുള്ള പ്രമേയം അവതരിപ്പിക്കാനുള്ള ഇടതുപക്ഷാംഗങ്ങളുടെ നീക്കം പരാജയപ്പെട്ടത് സിപിഎമ്മിന് തിരിച്ചടിയായി. വിസി ഡോ: സാജു വിളിച്ചുചേർത്ത സെനറ്റിന്റെ പ്രത്യേക യോഗം സെർച്ച്‌ കമ്മിറ്റിയിലേയ്‌ക്ക്

പ്രതിനിധിയെ നൽകേണ്ടതില്ലെന്ന സിപിഎം അംഗങ്ങളുടെ ആവശ്യത്തിന്റെ അടിസ്ഥാനത്തിൽ അജണ്ടയിൽ നിന്നും പ്രതിനിധി തെരഞ്ഞെടുപ്പ് പിൻവലിച്ചു. സെർച്ച് കമ്മിറ്റി തിരഞ്ഞെടുപ്പ് അജണ്ടയ്‌ക്കെതിരെ പ്രമേയം അവതരിപ്പിക്കുവാൻ ഇടതുപക്ഷ സെനറ്റ് അംഗം പി.പി. ദിവ്യയാണ് ശ്രമിച്ചത്. യു.ഡി.എഫ്., എൻ.ഡി.എ അംഗങ്ങൾ ആക്റ്റും സ്റ്റാറ്റ്യൂട്ടും ചൂണ്ടിക്കാട്ടി നിയമപ്രശ്നം ഉന്നയിച്ചപ്പോൾ പ്രമേയം പിൻവലിച്ചു .

വിസിതന്നെ നിശ്ചയിച്ച അജണ്ട പിൻവലിക്കരുതെന്നും പ്രതിനിധിയെ നിശ്ചയിക്കണമെന്നും യു.ഡി.എഫ്., എൻ.ഡി.എ അംഗങ്ങൾ ആവശ്യമുന്നയിച്ചപ്പോൾ വിഷയം വോട്ടിനിടുകയായിരുന്നു. സ്റ്റാറ്റ്യൂട്ട് പഠിക്കാതെ പ്രമേയം അവതരിപ്പിക്കാൻ അനുമതി തേടിയപ്പോൾ എൻ.ഡി.എ, യു.ഡി.എഫ് അംഗങ്ങൾ നിയമപ്രശ്നം കൃത്യമായി ചൂണ്ടിക്കാണിച്ചതിനാലാണ് സിപിഎമ്മിലെ സെനറ്റ് അംഗത്തിന് പ്രമേയം പിൻവലിക്കേണ്ടി വന്നത്. കേരള സർവ്വകലാശാലയിൽ സെർച്ച്‌ കമ്മിറ്റി പ്രതിനിധിയെ തിരഞ്ഞെടുക്കാൻ വിളിച്ചു ചേർത്ത യോഗം മന്ത്രി ഡോ. ബിന്ദു തന്നെ അധ്യക്ഷത വഹിച്ച് സമാന പ്രമേയം അംഗീകരിച്ചത് വിവാദമായിരുന്നു.

കണ്ണൂർ യൂണി. സെനറ്റ് യോഗത്തിൽ സെർച്ച് കമ്മിറ്റി അംഗത്തെ തെരഞ്ഞെടുക്കാനുള്ള അജണ്ട ഒഴിവാക്കണമെന്ന പ്രമേയം പരിഗണിക്കാതിരിക്കുകയും അതേസമയം, അജണ്ടയിലെ നടപടികൾ ഒഴിവാക്കണോ എന്ന വിഷയത്തിൽ വോട്ടെടുപ്പ് നടത്തുകയുമായിരുന്നു. വോട്ടെടുപ്പിൽ ഇടതുപക്ഷത്തിന് 48 ഉം എൻ.ഡി.എ, യു.ഡി.എഫ് വിഭാഗത്തിന് 25 ഉം വോട്ടുമാണ് ലഭിച്ചത്.

സെർച്ച് കമ്മിറ്റി അംഗത്തെ തെരഞ്ഞെടുക്കാനുള്ള അജണ്ടയിലേക്ക് വി.സി. കടന്ന ഉടൻ തന്നെ എൻ.ഡി.എ അംഗവും യു.ഡി.എഫ് അംഗവും തങ്ങളുടെ നാമനിർദ്ദേശങ്ങൾ അവതരിപ്പിച്ചിരുന്നു. ഇതോടെ ഇടത് അംഗങ്ങൾ എഴുന്നേറ്റ് നിന്ന് ബഹളം വച്ചതിനെ തുടർന്നാണ് തുടർ നടപടികൾ സംബന്ധിച്ച് വോട്ടെടുപ്പ് നടത്താൻ വൈസ് ചാൻസലർ തീരുമാനിച്ചത്.

ഇത് പ്രകാരം തെരഞ്ഞെടുപ്പ് നടപടി ‘ഒഴിവാക്കിയത് പുതിയ കണ്ണൂർ വി.സി. നിയമനം വീണ്ടും അനിശ്ചിതമായി നീളാൻ ഇടയാക്കും. സിണ്ടിക്കേറ്റിലേക്കുള്ള വിദ്യാർത്ഥി പ്രതിനിധിയായി വൈഷ്ണവ് മഹേന്ദ്രനേയും ഫിനാൻസ് കമ്മിറ്റി പ്രതിനിധിയായി പി.ജെ. സാജുവിനെയും തെരഞ്ഞെടുത്തു. ഗവർണറുടെ നോമിനികളായ സെനറ്റ് അംഗങ്ങളെ യോഗത്തിൽ പങ്കെടുക്കാൻ അനുവദിക്കില്ലെന്ന എസ്.എഫ്.ഐ – ഡി.വൈ.എഫ്.ഐ പ്രവർത്തകരുടെ ഭീഷണിയെ തുടർന്ന് യൂണിവേഴ്സിറ്റി പരിസരത്തും യോഗസ്ഥലത്തും വൻ പൊലീസ് സന്നാഹത്തെ വിന്യസിച്ചിരുന്നു.