മലപ്പുറം : പ്രായപൂർത്തിയാകാത്ത പെൺകുട്ടിയെ പ്രണയം നടിച്ച് അസമിൽ നിന്ന് മലപ്പുറം പെരിന്തൽമണ്ണയിൽ എത്തിച്ചു പീഡിപ്പിച്ചു. മറ്റുള്ളവരിൽ നിന്ന് പണം വാങ്ങി പീഡനത്തിന് സൗകര്യം ഒരുക്കുകയും ചെയ്തു.
കേസിൽ അസം സ്വദേശി അടക്കം രണ്ടുപേർ അറസ്റ്റിലായി. പെൺകുട്ടിയെ എത്തിച്ച അസം സ്വദേശി ജാഹിദുൽ ഇസ്ലാം, മണ്ണാർക്കാട് തച്ചനാട്ടുകര സ്വദേശി കൂരിക്കാടൻ മുഹമ്മദ് ഷഹനാസ് ഷിബിൻ എന്നിവരെയാണ് പെരിന്തൽമണ്ണ പോലീസ് അറസ്റ്റ് ചെയ്തത്.
മാസങ്ങൾക്ക് മുമ്പ് പെരിന്തൽമണ്ണയിൽ എത്തിച്ച പെൺകുട്ടിയെ വാടക കോർട്ടേഴ്സുകളിൽ താമസിപ്പിച്ച് പീഡനത്തിന് സൗകര്യം ചെയ്യുകയായിരുന്നു. പെൺകുട്ടി ഗർഭിണിയായിരുന്നു. ആശുപത്രിയിൽ എത്തിയതോടെയാണ് പോലീസിനെ വിവരം ലഭിച്ചത്. ജാഹിദുൽ ഇസ്ലാംപെരിന്തൽമണ്ണയിൽ എത്തി ഒരു വർഷത്തോളം കഴിഞ്ഞാണ് 17കാരിയായ പെൺകുട്ടിയെ എത്തിച്ചത്.
പോക്സോ ഉൾപ്പെടയുള്ള വകുപ്പുകൾ ചേർത്ത് പെരിന്തൽമണ്ണ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. ഇനിയും പ്രതികളെ അറസ്റ്റ് ചെയ്യാനുണ്ടെന്ന് എസ് ഐ ഷിജോ സി തങ്കച്ചൻ അറിയിച്ചു.
പെരിന്തൽമണ്ണ ജുഡീഷ്യൽ ഫസ്റ്റ് മജിസ്ട്രേറ്റ് കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. എ എസ് ഐ അനിത, സീനിയർ സിപിഒ മാരായ ഷജീർ, സത്താർ, സിപിഒ സില്മന് എന്നിവരാണ് അന്വേഷണ സംഘത്തിലുണ്ടായിരുന്നത്.
