ഭുവനേശ്വര്‍: പ്രണയത്തില്‍നിന്ന് പിന്മാറിയതിന്റെ പകയില്‍ യുവതിയെയും സഹപാഠിയെയും യുവാവ് കുത്തിക്കൊന്നു. ഒഡിഷയിലെ സുന്ദര്‍ഘട്ട് സ്വദേശിയും എം.ബി.എ. വിദ്യാര്‍ഥിനിയുമായ ലിപ്സ(25) സഹപാഠി പ്രതാപ് ലര്‍ക്ക(26) എന്നിവരാണ് കൊല്ലപ്പെട്ടത്. ലിപ്സയുടെ വീട്ടിലെ മുന്‍ ഡ്രൈവറായിരുന്ന രാജുനാഗ് ആണ് ഇരുവരെയും കൊലപ്പെടുത്തിയതെന്നും ഇയാള്‍ ഒളിവില്‍പോയെന്നും പോലീസ് പറഞ്ഞു.
ലിപ്സയുടെ വീട്ടില്‍ രാജു ജോലി ചെയ്തിരുന്ന കാലത്ത് ഇരുവരും അടുപ്പത്തിലായിരുന്നു. ലിപ്സ ബന്ധത്തില്‍നിന്ന് പിന്മാറിതോടെ പ്രതി ഉപദ്രവം തുടങ്ങി. കഴിഞ്ഞ ദിവസം രാത്രി പത്തുമണിയോടെയാണ് പെണ്‍കുട്ടിയുടെ വീട്ടിലെത്തിയാണ് പ്രതി ആക്രമണം നടത്തിയത്. ലിപ്സയെ തനിക്കൊപ്പം വിട്ടയക്കണമെന്ന് പ്രതി വീട്ടുകാരോട് ആവശ്യപ്പെട്ടു. പെണ്‍കുട്ടിയുടെ മാതാപിതാക്കള്‍ എതിര്‍ത്തതോടെ പ്രതി ബലം പ്രയോഗിച്ച് മുറിക്കുള്ളിലേക്ക് കയറി പെണ്‍കുട്ടിയെ കത്തി കൊണ്ട് കുത്തിപ്പരിക്കേല്‍പ്പിക്കുകയുമായിരുന്നു.
പെണ്‍കുട്ടിയുടെ കഴുത്തിലും കൈയിലും പുറത്തും കുത്തേറ്റു. തടയാന്‍ ശ്രമിച്ച മാതാപിതാക്കളെയും ആക്രമിച്ചു. ഈ സമയത്താണ് മറ്റൊരു മുറിയിലുണ്ടായിരുന്ന പ്രതാപ് പുറത്തേക്കെത്തി പെണ്‍കുട്ടിയെ രക്ഷിക്കാന്‍ ശ്രമിച്ചത്. പ്രതാപിനെയും രാജുനാഗ് കുത്തി. മാരകമായി കുത്തേറ്റെങ്കിലും പ്രതാപ് ലിപ്സയുടെ മാതാപിതാക്കളുടെ മുറിതുറന്ന് ഇവരെ മോചിപ്പിച്ചു. ഇതോടെ പ്രതി വീണ്ടും പ്രതാപിനെ ആക്രമിക്കുകയും പിന്നാലെ വീട്ടില്‍നിന്ന് കടന്നുകളയുകയുമായിരുന്നു. ഗുരുതരമായി പരിക്കേറ്റ നാലുപേരെയും അയല്‍ക്കാരാണ് ആശുപത്രിയില്‍ എത്തിച്ചപ്പോഴേക്ക് ലിപ്സയും പ്രതാപും മരിച്ചു.
കൊല്ലപ്പെട്ട ലിപ്സയും പ്രതാപും റൂര്‍ക്കേലയിലെ സ്വകാര്യകോളജിലെ എംബിഎ വിദ്യാര്‍ഥികളാണ്. വെള്ളിയാഴ്ച കോളജിലെ പരീക്ഷ കഴിഞ്ഞശേഷമാണ് പ്രതാപ് ലിപ്സയുടെ വീട്ടിലെത്തിയത്. സഹപാഠിയുടെ വീട്ടില്‍ തങ്ങിയശേഷം തിങ്കളാഴ്ച രാവിലെ സ്വദേശത്തേക്ക് മടങ്ങാനാരിക്കെയാണ് പ്രതാപ് കൊല്ലപ്പെട്ടത്.
പ്രതികരിക്കാൻ ഇവിടെ എഴുതുക: