നാഗ് അശ്വിൻ സംവിധാനം ചെയ്ത ‘കൽക്കി 2898 എഡി’ കളക്ഷൻ റെക്കോർഡുകൾ ഭേദിച്ച് മുന്നേറുകയാണ്. ചുരുങ്ങിയ ദിവസങ്ങൾ കൊണ്ടാണ് ചിത്രം 1000 കോടി ക്ലബ്ബിൽ ഇടം നേടിയത്. സയൻസ് ഫിക്ഷൻ ഡിസ്ടോപ്പിയൻ ഗണത്തിൽപെടുന്ന കൽക്കിയിൽ നായകൻ പ്രഭാസിനൊപ്പം അമിതാഭ് ബച്ചൻ, കമൽ ഹാസൻ, ദീപിക പദുകോൺ, ദിഷ പഠാനി,ദുൽഖർ സൽമാൻ, വിജയ് ദേവരകൊണ്ട, അന്ന ബെൻ, ശോഭന തുടങ്ങി വലിയ താരനിര പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
കഴിഞ്ഞദിവസം, സെറ്റിൽ വെച്ച് അമിതാഭ് ബച്ചൻ തന്നോട് വാഷ് റൂമിൽ പോവാൻവേണ്ടി സമ്മതം ചോദിച്ചതിനെ കുറിച്ച് സംവിധായകൻ നാഗ് അശ്വിൻ വെളിപ്പെടുത്തിയിരുന്നു. ഇപ്പോഴിതാ അതിനെ കുറിച്ച് അമിതാഭ് ബച്ചൻ പറഞ്ഞ വാക്കുകളാണ് ചർച്ചയാവുന്നത്. ബാത്ത്റൂമിൽ പോകുമ്പോൾ താൻ സംവിധായകനോട് അനുവാദം തേടേണ്ടതുണ്ടെന്നും, അദ്ദേഹത്തിന്റെ സമയമാണ് അവിടെ പ്രധാനമെന്നും അമിതാഭ് ബച്ചൻ പറയുന്നു.
“അത് ലാളിത്യം ഒന്നുമല്ല. വളരെ സാധാരണമായ കാര്യമാണ്. ബാത്ത്‌റൂമിലേക്ക് പോകുമ്പോള്‍ ഞാന്‍ സംവിധായകനോട് അനുവാദം തേടേണ്ടതുണ്ട്. അത് അദ്ദേഹത്തിന്റെ സെറ്റാണ്. അദ്ദേഹത്തിന്റെ സമയമാണ്. അദ്ദേഹമാണ് അവിടത്തെ ക്യാപ്റ്റന്‍. ഞാന്‍ അവിടെ ജോലി ചെയ്യുന്ന വേലക്കാരന്‍ മാത്രമാണ്.
എനിക്ക് ബാത്ത്‌റൂമില്‍ പോകണമെങ്കില്‍ അദ്ദേഹത്തോട് അനുവാദം വാങ്ങണം. ചിലപ്പോള്‍ ലൈറ്റ് നോക്കുന്നതിനോ റിഹേഴ്‌സലിനു വേണ്ടിയോ ഞാനവിടെ നില്‍ക്കേണ്ടിയിരിക്കും. അദ്ദേഹമാണ് എന്നെ സെറ്റിലേക്ക് വിളിച്ചത്. അതിനാല്‍ അദ്ദേഹം പറയുന്നത് കേള്‍ക്കണം. അതിന് ഇത്ര ബഹളം എന്തിനാണ്.” എന്നാണ് അടുത്തിടെ ഒരു അഭിമുഖത്തിൽ അമിതാഭ് ബച്ചൻ പറഞ്ഞത്.
മഹാഭാരത യുദ്ധത്തിന് ശേഷം 6000 വർഷങ്ങൾക്കു ശേഷം നടക്കുന്ന സംഭവവികാസങ്ങളാണ് ചിത്രത്തിന്റെ പ്രമേയം. ബാഹുബലിക്ക് ശേഷം പ്രഭാസിന്റെ തിരിച്ചുവരവ് കൂടിയാണ് കൽക്കിയിലൂടെ ഇന്ത്യൻ സിനിമാലോകം സാക്ഷ്യം വഹിക്കുന്നത്. പുരാണ കഥാപാത്രമായ അശ്വത്ഥാമാവായാണ് ചിത്രത്തിൽ അമിതാഭ് ബച്ചൻ എത്തുന്നത്. യാഷ്കിൻ എന്ന വില്ലൻ കഥാപാത്രമായാണ് കമൽഹാസൻ ചിത്രത്തിലെത്തുന്നത്.
കൽക്കിയുടെ തിരക്കഥയും നാഗ് അശ്വിൻ തന്നെയാണ് രചിച്ചിരിക്കുന്നത്. വൈജയന്തി മൂവീസിന്റെ ബാനറിൽ സി. അശ്വനി ദത്ത് ആണ് ചിത്രം നിർമിച്ചിരിക്കുന്നത്. സന്തോഷ് നാരായണൻ ആണ് ചിത്രത്തിന്റെ ഗാനങ്ങൾ ഒരുക്കിയിരിക്കുന്നത്.
പ്രതികരിക്കാൻ ഇവിടെ എഴുതുക: