ന്യൂദല്ഹി: ഗൗരവ് ഗൊഗോയിയെ ലോക്സഭ ഉപനേതാവായും കൊടിക്കുന്നില് സുരേഷിനെ ലോക്സഭ ചീഫ് വിപ്പായും കോണ്ഗ്രസ് നിയോഗിച്ചു.
കോണ്ഗ്രസ് പാര്ലമെന്ററി പാര്ട്ടി അധ്യക്ഷ സോണിയ ഗാന്ധി ഇക്കാര്യം അറിയിച്ചുകൊണ്ട് ലോക്സഭാ സ്പീക്കര് ഓം ബിര്ളയ്ക്ക് കത്തയച്ചു. മാണിക്കം ടാഗോര്, മുഹമ്മദ് ജാവേദ് എന്നിവരാണ് പാര്ട്ടി വിപ്പുമാര്. തമിഴ്നാട്ടിലെ വിരുദുനഗര് മണ്ഡലത്തില് നിന്നുള്ള എംപിയാണ് മാണിക്കം ടാഗോര്. ബിഹാറിലെ കിഷന്ഗഞ്ച് മണ്ഡലത്തില് നിന്നുള്ള എംപിയാണ് ജാവേദ്. ആസാമിലെ ജോര്ഹട്ട് മണ്ഡലത്തില് നിന്നുള്ള എംപിയാണ് ഗൗരവ് ഗൊഗോയി.
വിപ്പിന് അംഗങ്ങള്ക്കുള്ള നിര്ദ്ദേശങ്ങള് വാക്കാലോ, രേഖാമൂലമോ നല്കാം. പാര്ട്ടി വിപ്പിന്റെ നിര്ദ്ദേശങ്ങള് അനുസരിച്ചില്ലെങ്കില് കൂറുമാറ്റ നിരോധന നിയമപ്രകാരം ഒരു എംപിയെ അയോഗ്യനാക്കാം. ഇന്ഡി സഖ്യം ലോക്സഭാ സ്പീക്കര് സ്ഥാനത്തേക്ക് മാവേലിക്കര എംപിയായ കൊടിക്കുന്നില് സുരേഷിനെ മത്സരിപ്പിച്ചെങ്കിലും പരാജയപ്പെടുകയായിരുന്നു.
എട്ടു തവണ എംപിയായ കൊടിക്കുന്നില് സുരേഷിനെ കോണ്ഗ്രസ് ലോക്സഭാ പ്രതിപക്ഷ നേതാവാക്കണമെന്നായിരുന്നു ബിജെപി ആവശ്യപ്പെട്ടത്.
