തിരുവനന്തപുരം: കോവിഡ് കാലത്ത് വിതരണം ചെയ്ത കിറ്റിന്റെ കമ്മീഷന് സംസ്ഥാനത്തിന്റെ സാമ്പത്തിക സ്ഥിതി മെച്ചപ്പെടുന്ന മുറയ്ക്ക് പൂര്ണ്ണമായും കൊടുത്തു തീര്ക്കുമെന്ന് ഭക്ഷ്യമന്ത്രി ജി.ആര് അനില് അറിയിച്ചു. ഇതുള്പ്പെടെ സമരത്തിന് ആധാരമായി റേഷന് വ്യാപാരികള് ഉന്നയിച്ച ആവശ്യങ്ങളില് അനുഭാവപൂര്ണ്ണമായ സമീപനമാണ് സര്ക്കാരിനുള്ളതെന്നും അദ്ദേഹം പറഞ്ഞു. ഈ സാഹചര്യത്തില് റേഷന് ഡീലേഴ്സ് കോ-ഓര്ഡിനേഷന് സംസ്ഥാന കമ്മിറ്റിയുടെ നേതൃത്വത്തില് 8, 9 തീയതികളില് സംസ്ഥാന വ്യാപകമായി റേഷന്കടകള് അടച്ചിട്ട് നടത്തുമെന്ന് അറിയിച്ചിട്ടുള്ള സമരത്തില് നിന്ന് പിന്മാറണമെന്ന് ഭക്ഷ്യമന്ത്രി ആവശ്യപ്പെട്ടു. വേതന പാക്കേജ് പരിഷ്കരിക്കുക, കെ.ടി.പി.ഡി.എസ് ഓര്ഡറില് കാലോചിതമായ മാറ്റം വരുത്തുക എന്നീ ആവശ്യങ്ങള് സര്ക്കാര് അനുഭാവപൂര്വ്വം പരിഗണിച്ച് വരികയാണ്. ഇതിനായി നിയോഗിച്ച വിദഗ്ധ സമിതി റിപ്പോര്ട്ട് നല്കിയിട്ടുണ്ട്. റിപ്പോര്ട്ട് പരിശോധിച്ച് പ്രായോഗികമായി നടപ്പിലാക്കാന് കഴിയുന്ന കാര്യങ്ങളില് അടിയന്തിര നടപടി ഉണ്ടാകും. റേഷന് വ്യാപാരി ക്ഷേമനിധി ശക്തിപ്പെടുത്തണമെന്ന കമ്മിറ്റിയുടെ ആവശ്യത്തോട് പൂര്ണ്ണമായും യോജിക്കുന്നതായും അതിനുള്ള പദ്ധതികള് ആവിഷ്കരിച്ച് നടപ്പിലാക്കാന് ഉദ്ദേശിക്കുന്നതായും മന്ത്രിമാര് യോഗത്തെ അറിയിച്ചിരുന്നു.
