മുംബൈ: സിംബാബ്വെയ്‌ക്കെതിരായ ട്വന്റി20 പരമ്പരയ്‌ക്കുള്ള ടീമില്‍ മാറ്റങ്ങള്‍ വരുത്തി ബിസിസിഐ. സഞ്ജു സാംസണ്‍, ശിവം ദുബെ, യശസ്വി ജയ്സ്വാള്‍ എന്നിവര്‍ ആദ്യ രണ്ടു മത്സരങ്ങളില്‍ കളിക്കില്ല. പകരക്കാരായി ജിതേഷ് ശര്‍മ, സായ് സുദര്‍ശന്‍, ഹര്‍ഷിത് റാണ എന്നിവര്‍ ടീമിലെത്തി.
ട്വന്റി20 ലോകകപ്പ് നേടിയ ടീം ബാര്‍ബഡോസില്‍ കുടുങ്ങിയ സാഹചര്യത്തിലാണിത്. മോശം കാലാവസ്ഥയെ തുടര്‍ന്നാണ് ബാര്‍ബഡോസിലുള്ള ഇന്ത്യന്‍ ടീമിന്റെ യാത്ര വൈകുന്നത്.
സഞ്ജു സാംസണ്‍, യശസ്വി ജയ്സ്വാള്‍, ശിവം ദുബെ എന്നിവര്‍ ഇന്ത്യയിലെത്തിയ ശേഷം പിന്നീട് സിംബാബ്വെയിലേക്കു പോകും. ജൂലൈ ആറിനാണ് ഇന്ത്യ- സിംബാബ്വെ പരമ്പരയിലെ ആദ്യ മത്സരം.
ശുഭ്മന്‍ ഗില്ലാണ് ട്വന്റി20 പരമ്പരയില്‍ ഇന്ത്യന്‍ ടീമിനെ നയിക്കുന്നത്. സിംബാബ്വെയ്‌ക്കെതിരായ ആദ്യ രണ്ടു ട്വന്റി20 മത്സരങ്ങള്‍ക്കുള്ള ഇന്ത്യന്‍ ടീം: ശുഭ്മന്‍ ഗില്‍ (ക്യാപ്റ്റന്‍), ഋതുരാജ് ഗെയ്‌ക്വാദ്, അഭിഷേക് ശര്‍മ, റിങ്കു സിങ്, ധ്രുവ് ജുറെല്‍ (വിക്കറ്റ് കീപ്പര്‍), റിയാന്‍ പരാഗ്, വാഷിങ്ടന്‍ സുന്ദര്‍, രവി ബിഷ്ണോയി, ആവേശ് ഖാന്‍, ഖലീല്‍ അഹമ്മദ്, മുകേഷ് കുമാര്‍, തുഷാര്‍ ദേശ്പാണ്ഡെ, സായ് സുദര്‍ശന്‍, ജിതേഷ് ശര്‍മ (വിക്കറ്റ് കീപ്പര്‍), ഹര്‍ഷിത് റാണ.
