ബെംഗളൂരു: പരാതി നൽകാൻ എസ്പി ഓഫീസിലെത്തിയ യുവതിയെ പൊലീസുകാരനായ ഭർത്താവ് കുത്തിക്കൊലപ്പെടുത്തി. കർണാടകത്തിലെ ഹാസൻ പോലീസ് സൂപ്രണ്ട് ഓഫീസിനുള്ളിൽ ഇന്നലെ രാവിലെയാണ് യുവതി ഭർത്താവിന്റെ കുത്തേറ്റ് കൊല്ലപ്പെട്ടത്. ഹാസൻ ഗൊരൂർ പോലീസ് സ്റ്റേഷനിലെ ഹെഡ് കോൺസ്റ്റബിൾ ലോക്നാഥാണ് ഭാര്യ മമത(37) കുത്തികൊലപ്പെടുത്തിയത്.
ഇയാളെ ഭാരതീയ ന്യായ സംഹിതയിലെ 103-ാം വകുപ്പുപ്രകാരം അറസ്റ്റ് ചെയ്തു.കുടുംബവഴക്കാണ് കൊലയ്‌ക്ക് കാരണമെന്ന് കരുതുന്നു.ലോക്നാഥും മമതയും തമ്മിൽ ഏതാനുംദിവസമായി വഴക്കുകൂടുന്നത് പതിവാണെന്ന് പോലീസ് പറഞ്ഞു. ലോക്നാഥിന്റെ പേരിൽ പരാതിനൽകാൻ പോലീസ് സൂപ്രണ്ട് ഓഫീസിലെത്തിയതായിരുന്നു മമത. പിറകെ ലോക്നാഥുമെത്തി.
പ്രകോപിതനായ ലോക്നാഥ് കൈവശമുള്ള കത്തികൊണ്ട് മമതയെ കുത്തിയെന്നാണ് പോലീസ് പറയുന്നത്. ഗുരുതരമായി പരിക്കേറ്റ മമതയെ പോലീസുകാർ സമീപത്തെ ഹാസൻ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിലെത്തിച്ചെങ്കിലും മരിച്ചു.
19 വർഷം മുൻപായിരുന്നു ഇരുവരുടെയും വിവാഹം. 24 വർഷത്തെ സർവീസുള്ളയാളാണ് ലോക്നാഥ്. ഹാസനിലെ അർക്കൽഗുഡ് സ്വദേശിയാണ്. മമത ഹാസൻ സ്വദേശിനിയും. ഇവർക്ക് പ്രീ യൂണിവേഴ്സിറ്റി കോളേജിലും ഒമ്പതാം ക്ലാസിലും പഠിക്കുന്ന രണ്ട് മക്കളുണ്ട്.
പ്രതികരിക്കാൻ ഇവിടെ എഴുതുക: