ആലപ്പുഴ: ഡിവൈഎഫ്‌ഐ മുന്‍ ഏരിയാ സെക്രട്ടറിക്കെതിരെ നല്‍കിയ ലൈംഗിക ചൂഷണ പരാതി പൊലീസ് അട്ടിമറിക്കുന്നുവെന്ന് യുവതി. കായംകുളം ഡിവൈഎഫ്‌ഐ മുന്‍ ഏരിയ സെക്രട്ടറിയും സിപിഎം പത്തിയൂര്‍ ലോക്കല്‍ കമ്മറ്റി അംഗവുമായ പ്രേംജിത്തിനെതിരെയാണ് യുവതി പരാതി നല്‍കിയത്.
അമ്മയുടെ പേരിലുള്ള സ്ഥാപനത്തില്‍ ജോലി ചെയ്യവേ ലൈംഗികമായി ചൂഷണം ചെയ്തുവെന്നാണ് യുവതിയുടെ പരാതി.
ലൈംഗിക ബന്ധത്തില്‍ ഏര്‍പ്പെടാനായി നേതാവ് നിരന്തരം നിര്‍ബന്ധിച്ചു. തുടര്‍ന്ന് ജോലി ഉപേക്ഷിച്ചെങ്കിലും കണക്ക് ശരിയാക്കാനെന്ന പേരില്‍ സ്ഥാപനത്തില്‍ വിളിച്ചു വരുത്തി പൂട്ടിയിട്ടെന്നും കുടുംബത്തെ വെട്ടി കൊല്ലുമെന്നും ഭീഷണിപ്പെടുത്തിയെന്ന് യുവതി പരാതിപ്പെട്ടു. പരാതിയില്‍ പൊലിസ് കേസെടുത്തു. എന്നാല്‍ പൊലീസ് കേസ് അട്ടിമറിക്കുകയാണെന്ന് യുവതി കുറ്റപ്പെടുത്തുന്നു.
നല്‍കിയ മൊഴി അല്ല പൊലിസ് രേഖപ്പെടുത്തിയതെന്ന് എഫ്‌ഐആര്‍ ലഭിച്ചപ്പോഴാണ് മനസിലായതെന്ന് യുവതി പറഞ്ഞു. പൊലിസ് ഇട്ട വകുപ്പില്‍ മാത്രം കേസെടുത്താല്‍ പോരെ എന്ന് ചോദിച്ചപ്പോള്‍ പറ്റില്ലെന്ന് പറഞ്ഞ് രണ്ടാമത് വീണ്ടും മൊഴി നല്‍കിയെന്നും യുവതി പറഞ്ഞു.എന്നാല്‍ ആരോപണം പൊലിസ് നിഷേധിച്ചു. പരാതി പ്രകാരമുള്ള വകുപ്പുകളാണ് ചേര്‍ത്തതെന്നും കൂടുതല്‍ കാര്യങ്ങള്‍ പറയാനുണ്ടെന്ന് പറഞ്ഞതിനാലാണ് മൊഴി വീണ്ടും രേഖപ്പെടുത്തിയതെന്നും പൊലിസ് വ്യക്തമാക്കി. എന്നാല്‍ കള്ളപ്പരാതിയെന്നാണ് പ്രേംജിത്ത് പറയുന്നത്.
പ്രതികരിക്കാൻ ഇവിടെ എഴുതുക: