ബ്രിഡ്ജ്ടൗണ്: ട്വന്റി20 ക്രിക്കറ്റ് കരിയര് അവസാനിപ്പിക്കാന് തീരുമാനിച്ച് ഭാരത ഓള്റൗണ്ടര് രവീന്ദ്ര ജഡേജ. ഭാരതം രണ്ടാം ട്വന്റി20 ലോകകിരീടം നേടിയതിന് പിന്നാലെയാണ് ജഡേജയുടെ വിരമിക്കല് പ്രഖ്യാപനം. തുടരെയുള്ള ദിവസങ്ങളില് വിരമിക്കല് പ്രഖ്യാപനം നടത്തുന്ന മൂന്നാമത്തെ സീനിയര് താരമായിരിക്കുകയാണ് ജഡേജ.
ദക്ഷിണാഫ്രിക്കയ്ക്കെതിരായ ഫൈനലിന് മുമ്പ് വിരാട് കോഹ്ലിയും ഫൈനലിന് ശേഷം രോഹിത് ശര്മയും വിരമിക്കല് പ്രഖ്യാപിച്ചിരുന്നു. ഇതിന് പിന്നാലെയാണ് ഇന്നലെ ജഡേജ ട്വന്റി20 മതിയാക്കുന്നതായി ഇന്സ്റ്റഗ്രാമില് പങ്കുവച്ചത്. അതേസമയം ടെസ്റ്റ്, ഏകദിന മത്സരങ്ങളില് തുടര്ന്നും കളിക്കുമെന്ന് താരം അറിയിച്ചു. കരിയറില് 74 അന്താരാഷ്ട്ര മത്സരങ്ങളില് ഭാരതത്തിനായി ട്വന്റി20 കുപ്പായമിട്ടിട്ടുണ്ട്. 127.6 പ്രഹരശേഷിയില് 515 റണ്സെടുത്തിട്ടുണ്ട്. 54 വിക്കറ്റുകളും നേടി. 35കാരനായ താരം ഐപിഎലില് ചെന്നൈ സുപ്പര് കിങ്സിലാണ് കളിക്കുന്നത്.
