ഇടുക്കി: മൂന്നാറില്‍ കക്കൂസ് മാലിന്യം പുഴയിലേക്ക് ഒഴുക്കിയ ഹോട്ടലും റിസോര്‍ട്ടും അധികൃതര്‍ ഇടപെട്ട് അടച്ചുപൂട്ടിച്ചു. മൂന്നാര്‍ ടൗണില്‍ പ്രവര്‍ത്തിക്കുന്ന അല്‍ ബുഹാരി ഹോട്ടല്‍, തങ്കം ഇന്‍ റിസോര്‍ട്ട് എന്നിവയ്‌ക്കാണ് ആരോഗ്യ വകുപ്പ് പൂട്ടിട്ടത്. അനിശ്ചിത കാലത്തേക്കാണ് ഹോട്ടലും റിസോര്‍ട്ടും അടപ്പിച്ചത്.
നല്ലതണ്ണിയാറിലേക്കാണ് കക്കൂസ് മാലിന്യം ഒഴുക്കി വിട്ടത്. സ്ഥാപനങ്ങള്‍ക്ക് ഒരു ലക്ഷം രൂപ വീതം പിഴയിട്ടു.
പ്രദേശവാസികള്‍ നല്‍കിയ പരാതിലാണ് നടപടി. പ്രദേശത്ത് ദുര്‍ഗന്ധം പരന്നതോടെയാണ് നാട്ടുകാര്‍ ആരോഗ്യ വകുപ്പിനെയും പഞ്ചായത്തിനെയും സമീപിച്ചത്. റോഡരികില്‍ സ്ഥിതി ചെയ്യുന്ന ഈ കെട്ടിടങ്ങളുടെ പിന്‍ഭാഗത്ത് കൂടിയാണ് നല്ലതണ്ണിയാര്‍ ഒഴുകുന്നത്. നല്ലതണ്ണിയാര്‍ ഒഴുകിയെത്തുന്നത് മുതിരപ്പുഴയാറിലാണ്. മുതിരപ്പുഴയാറിലെ വെള്ളം കുടിവെള്ളമായി ഉപയോഗിക്കുന്നുണ്ട്.
കൃത്യമായി മാലിന്യ സംസ്‌കരണത്തിനുള്ള നടപടി സ്വീകരിച്ച ശേഷം മലിനീകരണ നിയന്ത്രണ ബോര്‍ഡ് , ആരോഗ്യ വകുപ്പ് എന്നിവയുടെ അനുമതി ലഭിച്ച ശേഷമേ ഹോട്ടലും റിസോര്‍ട്ടും തുറക്കാന്‍ കഴിയൂ എന്ന് പഞ്ചായത്ത് അറിയിച്ചു.
പ്രതികരിക്കാൻ ഇവിടെ എഴുതുക: