കോട്ടയം: തെരുവുനായ ശല്യം നേരിടാന് കോട്ടയം മെഡിക്കല് കോളേജിന് സമീപം പാലക്കാട് മോഡല് ഷെല്ട്ടര് പണിയും. ഇത് സംബന്ധിച്ച് റിപ്പോര്ട്ട് സമര്പ്പിക്കാന് പൊതുമരാമത്ത് വകുപ്പിനും മൃഗസംരക്ഷണ വകുപ്പിനും ജില്ലാ കളക്ടറുടെ അധ്യക്ഷതയില് ചേര്ന്ന് യോഗം നിര്ദ്ദേശം നല്കി. മൃഗസ്നേഹിയായ പ്രദീപ് പയ്യൂര് പാലക്കാട്ട് സ്ഥാപിച്ചിട്ടുള്ള ഷെല്ട്ടര് മാതൃകയിലാവും കോട്ടയം മെഡിക്കല് കോളേജിനു സമീപവും സ്ഥാപിക്കുക എന്നാണ് അറിയുന്നത്.
അടുത്തിടെ കോട്ടയം മെഡിക്കല് കോളേജ് ഹോസ്റ്റലില് ആറു വിദ്യാര്ത്ഥികള്ക്ക് നായ്ക്കളുടെ കടിയേറ്റിരുന്നു. ഈ സാഹചര്യം കൂടി കണക്കിലെടുത്താണ് തെരുവുനായ് സംരക്ഷണ പദ്ധതി തയ്യാറാക്കുന്നത്. കോട്ടയം മെഡിക്കല് കോളേജിനോട് ചേര്ന്നുള്ള ശ്മശാനത്തിന് സമീപമാണ് ഇതിനായി സ്ഥലം കണ്ടെത്തുക. ജനവാസ മേഖല അല്ലാത്തതിനാല് ഇക്കാര്യത്തില് എതിര്പ്പുമുണ്ടാകില്ലെന്നാണ് പ്രതീക്ഷ.
50 ലക്ഷം രൂപയാണ് ചെലവു കണക്കാക്കുന്നത്. ആര്പ്പൂക്കര, അതിരമ്പുഴ പഞ്ചായത്തുകള്ക്ക് സ്വന്തം നിലയ്ക്ക് ഇത്രയും തുക ചെലവഴിക്കാന് കഴിയില്ലെന്ന നിലപാടാണ് അധികൃതര് സ്വീകരിച്ചത് . ഇതിനാല് ബ്ലോക്ക്, ജില്ലാ പഞ്ചായത്തുകളുടെ സഹായം കൂടി ഇക്കാര്യത്തില് തേടും. ഓരോ പഞ്ചായത്തും എബിസി പദ്ധതി പ്രകാരം മൂന്ന് മുതല് 5 ലക്ഷം വരെയാണ് സാധാരണ നിലയില് ബഡ്ജറ്റ് വിഹിതമായി വകയിരുത്തുക.
