തിരുവനന്തപുരം: കെഎസ്ആര്ടിസിയുടെ ഡ്രൈവിംഗ് സ്കൂളിന്റേയും സോളാര് പവര് പ്ളാന്റിന്റേയും സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയന് ബുധനാഴ്ച നിര്വഹിക്കും. ആനയറ കെ എസ് ആര് ടി സി സ്വിഫ്റ്റ് ആസ്ഥാനത്ത് ഉച്ചയ്ക്ക് 12ന് നടക്കുന്ന ചടങ്ങില് ഗതാഗത മന്ത്രി കെ ബി ഗണേഷ്കുമാര് അധ്യക്ഷനാകും.
ഉന്നത നിലവാരത്തിലുള്ള ഡ്രൈവിംഗ് പരിശീലനം ഉറപ്പാക്കുക ലക്ഷ്യമിട്ടാണ് കെ എസ് ആര് ടി സി ഡ്രൈവിംഗ് സ്കൂളുകള് എന്ന പുതിയ സംരംഭത്തിന് തുടക്കമിടുന്നത്. വിവിധ ഡിപ്പോകളില് ആധുനിക സംവിധാനങ്ങളോടെയാണ് ഇവ പ്രവര്ത്തിക്കുക.
ആദ്യഘട്ടമായി കെ എസ് ആര് ടി സിയുടെ കീഴില് ഡ്രൈവിംഗ് സ്കൂള് തുടങ്ങുന്നത് 23 കേന്ദ്രങ്ങളിലായിരിക്കും.മിതമായ നിരക്കില് മികച്ച നിലവാരത്തിലുള്ള ഡ്രൈവിംഗ് പരിശീലനം നല്കുകയാണ് ലക്ഷ്യം.
കെ എസ് ആര് ടി സിയിലെ വിദഗ്ധ ഇന്സ്ട്രക്ടര്മാരുടെ സേവനമുള്പ്പെടെ ഡ്രൈവിംഗ് സ്കൂളുകള്ക്കായി വിനിയോഗിക്കും. ദേശീയ അന്തര്ദ്ദേശീയ നിലവാരത്തിലുള്ള ലൈറ്റ്മോട്ടോര് ഡ്രൈവിംഗ് പരിശീലനം ഈ കേന്ദ്രങ്ങളില് ലഭ്യമാക്കും.
ആധുനിക സംവിധാനങ്ങളോടെ ആരംഭിക്കുന്ന ഡ്രൈവിംഗ് സ്കൂളുകളില് കെ എസ് ആര് ടി സി ഡ്രൈവര്മാര്ക്ക് അധിക പരിശീലനം നല്കുന്നതടക്കമുള്ള കാര്യങ്ങളും പരിഗണിക്കുമെന്നാണ് സൂചന.
