കൊല്ലം: കുറവ സമുദായത്തെ ജാതീയമായി അധിക്ഷേപിക്കുന്ന ‘കാതോട് കാതോരം’ സീരിയല് സംപ്രേഷണം നിര്ത്താന് ഏഷ്യാനെറ്റ് ചാനല് തയ്യാറാകണമെന്ന് ബിജെപി പട്ടികജാതി മോര്ച്ച സംസ്ഥാന പ്രസിഡന്റ് ഷാജുമോന് വട്ടേക്കാട് ആവശ്യപ്പെട്ടു.
ആവിഷ്കാര സ്വാതന്ത്ര്യത്തിന്റെ പേരില് ആദിമ ഗോത്ര വിഭാഗവും ഭരണഘടനയില് പ്രത്യേകം പരിഗണന നല്കുന്ന കുറവ ജാതിയെ ജാതീയമായി അധിക്ഷേപിച്ച നടപടി പ്രതിഷേധാര്ഹമാണ്. ഒരു ജാതിയെ ആക്ഷേപിക്കുകയും പൊതുസമൂഹത്തിനു മുന്നില് ആക്ഷേപിക്കുകയും ചെയ്യുന്ന സീരിയല് സംപ്രേഷണം നിര്ത്തണം. യുട്യൂബ്, സോഷ്യല് മീഡിയ എന്നിവയില് നിന്ന് പിന്വലിക്കണം.
പ്രസ്തുത സീരിയലില് കുറവ സമുദായത്തെ ആക്ഷേപിക്കുന്ന ഭാഗങ്ങള് നീക്കാന് നിര്മാതാവും സംവിധായകനും തയ്യാറാകണമെന്നും കുറവ സമൂഹത്തോട് മാപ്പ് പറയണമെന്നും ഷാജുമോന് വട്ടേക്കാട് ആവശ്യപ്പെട്ടു. ബിജെപി കൊല്ലം ജില്ല കമ്മിറ്റിയുടെ നേതൃത്വത്തില് ഏഷ്യാനെറ്റ് കേരള ഹെഡ്ഓഫീസില് പ്രതിഷേധം അറിയിച്ചു. സോഷ്യല് മീഡിയ ക്യാമ്പയിനും നടക്കുകയാണ്.
