പാലക്കാട്: ഒറ്റപ്പാലം അമ്പലപ്പാറയിൽ കാറിലെത്തിയ സംഘം യുവാവിനെ തട്ടിക്കൊണ്ടുപോകാൻ ശ്രമിച്ചതായി പരാതി. അമ്പലപ്പാറ പൊട്ടച്ചിറ സന്തോഷ് കുമാറിനെയാണ് വീടിന് സമീപത്ത് നിന്ന് തട്ടിക്കൊണ്ടുപോകാൻ ശ്രമിച്ചത്.
വെള്ള സ്കോർപിയോ കാറിൽ എത്തിയ അഞ്ചംഗ സംഘമാണ് തട്ടിക്കൊണ്ടുപോകാനുള്ള ശ്രമം നടത്തിയത്. ബുധനാഴ്ച രാവിലെയാണ് സംഭവം. സ്കോർപ്പിയോ റോഡിന് കുറുകെ ഇടുകയാണുണ്ടായത്. സ്കൂട്ടറിൽ പോകുകയായിരുന്ന സന്തോഷിനെ ആക്രമിച്ച ശേഷം ബലമായി വണ്ടിയിൽ പിടിച്ചു കയറ്റാൻ ശ്രമിക്കുകയായിരുന്നു. സമീപത്തെ വീട്ടിലേക്ക് ഓടിക്കയറിയാണ് സന്തോഷ് കുമാർ രക്ഷപ്പെട്ടത്.
തനിക്ക് ശത്രുക്കൾ ഒന്നും ഇല്ലെന്നാണ് സന്തോഷ് കുമാർ പറയുന്നു. നേരത്തെ സന്തോഷ് കുമാർ മുംബൈയിലെ സ്വർണ്ണക്കടയിൽ ജോലി ചെയ്തിരുന്നു. അവിടെ ഉണ്ടായ തർക്കവുമായി ബന്ധപ്പെട്ടാണ് തട്ടിക്കൊണ്ടുപോകലെന്ന് സംശയിക്കുന്നതായി പോലീസ് അറിയിച്ചു. സംഘത്തിലുണ്ടായിരുന്നവരെ സന്തോഷ് ഇതുവരെ തിരിച്ചറിഞ്ഞിട്ടില്ല.
സിസിടിവിയിൽ പതിഞ്ഞ വെള്ള സ്കോർപിയോ കാർ കേന്ദ്രീകരിച്ച് ഒറ്റപ്പാലം പോലീസ് അന്വേഷണം ആരംഭിച്ചു. കഴിഞ്ഞ കുറച്ചു ദിവസമായി ഒരു സ്കോർപിയോ കാർ പ്രദേശത്ത് ചുറ്റി കറങ്ങുന്നതായി നാട്ടുകാരും പറയുന്നു.
