മലയാളത്തിന്റെ പ്രിയനടി ശ്രീവിദ്യ ഓർമ്മയായിട്ട് 18 വർഷങ്ങൾ പിന്നിടുന്നു. മലയാള സിനിമയുടെ ശ്രീ തന്നെയായിരുന്നു അക്ഷരാര്ഥത്തില് നടി ശ്രീവിദ്യ. ശ്രീത്വം തുളുമ്പുന്ന മുഖവും കുസൃതി നിറഞ്ഞ നോട്ടവും നിഷ്കളങ്കമായ ചിരിയുമായിരുന്നു ശ്രീവിദ്യയ്ക്ക്. വിടപറഞ്ഞ് 18 വര്ഷം പിന്നിടുമ്പോഴും അഭിനയത്തികവില് മലയാള സിനിമ പ്രേക്ഷകരുടെ ഹൃദയത്തില് എക്കാലവും ഇടംപിടിച്ച മഹാപ്രതിഭയാണ് താരം.
പതിമൂന്നാം വയസില് തിരുവുള് ചൊൽവർ എന്ന തമിഴ് ചിത്രത്തിലൂടെ വെള്ളിത്തിരയിലെത്തിയ ശ്രീവിദ്യയുടെ കരിയറിലെ ഏറ്റവും മികച്ച ചിത്രങ്ങളിൽ ഒന്നാണ് 1991ൽ പുറത്തിറങ്ങിയ എന്റെ സൂര്യപുത്രിക്ക്.
തോക്കും തീപ്പൊരി ഡയലോഗുകളുമൊക്കെ സുരേഷ് ഗോപിയുടെ ഭാഗമാകുന്നതിന് മുമ്പിറങ്ങിയ മികച്ച സിനിമകളിലൊന്ന് കൂടിയാണ് എന്റെ സൂര്യപുത്രിക്ക്. ശ്രീവിദ്യയ്ക്കും സുരേഷ് ഗോപിക്കും പുറമെ ചിത്രത്തിൽ മറ്റൊരു കേന്ദ്രകഥാപാത്രത്തെ അവതരിപ്പിച്ചത് നടി അമലയായിരുന്നു. ചിത്രത്തിലെ ഏറ്റവും ശ്രദ്ധനേടിയ ഗാനങ്ങളിൽ ഒന്നാണ് ആലാപനം തേടും എന്ന ഗാനം.
ഇപ്പോഴിതാ ചിത്രത്തിലെ ഗാനരംഗം ശ്രീവിദ്യയുടെ ഗെറ്റപ്പിൽ മേക്കോവർ നടത്തി പെർഫോം ചെയ്തിരിക്കുകയാണ് നടിയും മുൻ ബിഗ് ബോസ് താരവുമായ വീണ നായർ. ശ്രീവിദ്യയെ അനുകരിച്ച് വീണ നായര് ചെയ്ത റീല് വീഡിയോ ഇപ്പോള് സോഷ്യല് മീഡിയയില് വൈറലാണ്. ശ്രീവിദ്യ അമ്മയുടെ ഒരു കഥാപാത്രത്തെ പുനരാവിഷ്കരിക്കണമെന്നത് ഒരുപാട് നാളത്തെ ആഗ്രഹമായിരുന്നു.
ഞങ്ങളുടെ പരിധിക്കുള്ളിൽ നിന്ന് ഒരു നല്ല ടീമിനെ വെച്ചാണ് ഞാൻ ഇത് രൂപപ്പെടുത്തിയത്… എന്നാണ് ശ്രീവിദ്യയെ അനുകരിച്ച് ചെയ്ത റീൽ പങ്കിട്ട് വീണ നായർ കുറിച്ചത്. എല്ലാവരും വീണയുടെ മേക്കോവർ കണ്ട് അമ്പരന്നു. വീഡിയോയില് വീണ നായരെ കണ്ടാല് ഒറ്റ നോട്ടത്തില് ശ്രീവിദ്യ തന്നെ എന്നെ തോന്നുകയുള്ളു എന്നാണ് ഏറെയും കമന്റുകൾ.
അബി ഫൈന് ഷൂട്ടേഴ്സാണ് ഡിഒപിയും എഡിറ്റിങും ചെയ്തത്. മഞ്ജു കല്ലൂന, നിഥിന് സുരേഷ് തുടങ്ങിയവര് ചേര്ന്നാണ് വീണയെ ശ്രീവിദ്യയെ പോലെ അണിയിച്ചൊരുക്കിയത്. പഴയ കാലത്തെ ഓര്മപ്പെടുത്തുന്ന വീണ ധരിച്ചിരിയ്ക്കുന്ന സാരി ഡിസൈന് ചെയ്തത് ശോഭ വിശ്വനാഥിന്റെ വീവേഴ്സ് വില്ലേജാണ്.
ശരീരപ്രകൃതം കൊണ്ടും ചുവന്ന വട്ടപ്പൊട്ടും അഴിച്ചിട്ട മുടിയും വട്ടമുഖവും എല്ലാംകൊണ്ട് ശ്രീവിദ്യയുമായി നല്ല രൂപസാദൃശ്യം ഒറ്റനോട്ടത്തിൽ തന്നെ വീണയിൽ തോന്നും. നിരവധി പേരാണ് വീണയുടെ പരിശ്രമത്തെ പ്രശംസിച്ച് എത്തിയത്. ചിലരൊക്കെ വീഡിയോ കണ്ട് ഇമോഷണലായി എന്നത് കമന്റുകളിൽ നിന്ന് വ്യക്തമാണ്.
ബീന ആന്റണി, ധന്യ മേരി വര്ഗീസ്, അനുമോള്, ദീപ്തി വിധുപ്രതാപ്, ശ്രുതി രജിനികാന്ത് തുടങ്ങിയ സെലിബ്രിറ്റികളെല്ലാം കമന്റുകൾ കുറിച്ചിട്ടുണ്ട്. ശ്രീവിദ്യയെ അനുകരിക്കുന്നവർ വളരെ ചുരുക്കമാണ്. അതുെകാണ്ട് തന്നെയാണ് വീണയുടെ വീഡിയോ ഇത്രയധികം ശ്രദ്ധിക്കപ്പെട്ടതും
