ന്യൂദൽഹി : വർഗീയ കലാപം നിലനിൽക്കുന്ന മണിപ്പൂരിലെ സുരക്ഷയെ സംബന്ധിച്ച് കേന്ദ്ര ആഭ്യന്തര മന്ത്രി അമിത് ഷാ ഇന്ന് അവലോകനം ചെയ്യും. ഞായറാഴ്ച മണിപ്പൂർ ഗവർണർ അനുസൂയ ഉയ്കെ ദൽഹിയിലെത്തി അമിത് ഷായെ സന്ദർശിച്ചിരുന്നു.
ഇരുവരും വടക്കുകിഴക്കൻ സംസ്ഥാനത്തെ സ്ഥിതിഗതികൾ ചർച്ച ചെയ്തെന്നാണ് വിവരം. കേന്ദ്ര-സംസ്ഥാന സർക്കാരുകളിലെയും മറ്റ് സുരക്ഷാ സേനകളിലെയും മുതിർന്ന ഉദ്യോഗസ്ഥരും ഉന്നതതല യോഗത്തിൽ പങ്കെടുക്കുമെന്ന് അധികൃതർ അറിയിച്ചു.
ഭൂരിപക്ഷമായ മെയ്തേയ് സമുദായത്തിന്റെ പട്ടിക വർഗ പദവി ആവശ്യത്തിനെതിരെ പ്രതിഷേധിച്ച് സംസ്ഥാനത്തെ മലയോര ജില്ലകളിൽ ആഹ്വാനം ചെയ്ത ഗോത്രവർഗ ഐക്യദാർഢ്യ മാർച്ചിന് ശേഷമാണ് മണിപ്പൂരിലെ സ്ഥിതിഗതികൾ മാറിമറിഞ്ഞത്.
2023 മെയ് 3 ന് സംസ്ഥാനത്ത് വംശീയ അക്രമം പൊട്ടിപ്പുറപ്പെട്ടു. ഇപ്പോഴും തുടരുന്ന അക്രമത്തിൽ കുക്കി, മെയ്തേയ് വിഭാഗങ്ങളിൽപ്പെട്ടവരും സുരക്ഷാ ഉദ്യോഗസ്ഥരുമായ 220-ലധികം പേർ കൊല്ലപ്പെട്ടു.
മണിപ്പൂരിലെ ജനസംഖ്യയുടെ 53 ശതമാനവും ഇംഫാൽ താഴ്വരയിലാണ് താമസിക്കുന്നത്. അതേസമയം നാഗകളും കുക്കികളും ഉൾപ്പെടുന്ന ഗോത്രവർഗക്കാർ 40 ശതമാനവും പ്രധാനമായും മലയോര ജില്ലകളിൽ താമസിക്കുന്നു.
ജൂൺ 10 ന്, ആർഎസ്എസ് മേധാവി മോഹൻ ഭാഗവത് മണിപ്പൂർ വിഷയം മുൻഗണനയോടെ പരിഗണിക്കണമെന്ന് ആവശ്യപ്പെട്ടിരുന്നു. മണിപ്പൂരിൽ നിന്ന് ഒരു വർഷത്തിന് ശേഷവും സമാധാനം കൈമോശം വരുന്നതിൽ അദ്ദേഹം ആശങ്ക പ്രകടിപ്പിച്ചു.
മണിപ്പൂരിലെ സാഹചര്യം മുൻഗണനയോടെ പരിഗണിക്കേണ്ടതുണ്ടെന്നും തിരഞ്ഞെടുപ്പ് വാചകങ്ങൾ മറികടന്ന് രാജ്യം നേരിടുന്ന പ്രശ്നങ്ങളിൽ ശ്രദ്ധ കേന്ദ്രീകരിക്കേണ്ടതുണ്ടെന്നും ഭഗവത് പറഞ്ഞു.
