സെന്റ് ലൂസിയ: ടി 20 ലോകകപ്പ് ക്രിക്കറ്റില്‍ ഗ്രൂപ്പ് ബിയിലെ നാല് മത്സരങ്ങളും ജയിച്ച് ഓസ്ട്രേലിയ. ഇന്നലെ നടന്ന അവസാന മത്സരത്തില്‍ വാശിയോടെ പൊരുതയ സ്‌കോട്ട്ലന്‍ഡിനെ അഞ്ച് വിക്കറ്റിന് തോല്‍പ്പിച്ചു.
ആദ്യം ബാറ്റ് ചെയ്ത് സ്‌കോട്‌ലന്‍ഡ് ഉയര്‍ത്തിയ 181 റണ്‍സ് വിജയലക്ഷ്യം അഞ്ച് വിക്കറ്റും രണ്ട് പന്തും ബാക്കിനില്‍ക്കേ 186 റണ്‍സെടുത്ത് ഓസ്ട്രേലിയ മറികടന്നു. മാര്‍ക്കസ് സ്റ്റോയിനിസ് വെടിക്കെട്ടിലായിരുന്നു കങ്കാരുക്കളുടെ തകര്‍പ്പന്‍ ജയം. സ്‌കോട്ടിഷ് ടീം തോറ്റതോടെ ഇംഗ്ലണ്ട് ഗ്രൂപ്പ് ബിയില്‍ നിന്ന് രണ്ടാമന്മാാരായി സൂപ്പര്‍ എട്ടിലേക്ക് മാര്‍ച്ച് ചെയ്തു. ഇംഗ്ലണ്ടിനും സ്‌കോട്‌ലന്‍ഡിനും അഞ്ച് പോയിന്‍് വീതമാണെങ്കിലും മികച്ച റണ്‍റേറ്റ് ഇംഗ്ലീഷ് ടീമിന് തുണയായി.
ടോസ് നഷ്ടപ്പെട്ട് ആദ്യം ബാറ്റ് ചെയ്യേണ്ടിവന്നിട്ടും കങ്കാരുക്കളെ സ്‌കോട്‌ലന്‍ഡ് വിറപ്പിച്ചു. സ്‌കോര്‍ ബോര്‍ഡില്‍ മൂന്ന് റണ്‍സ് മാത്രമുള്ളപ്പോള്‍ രണ്ട് റണ്ണെടുത്ത മൈക്കല്‍ ജോണ്‍സിനെ സ്‌കോട്ട്ലന്‍ഡിന് നഷ്ടമായി. എന്നാല്‍ രണ്ടാം വിക്കറ്റില്‍ ജോര്‍ജ് മന്‍സിയും ബ്രണ്ടന്‍ മക്മുല്ലനും ചേര്‍ന്ന് ഇന്നിങ്സ് കെട്ടിപ്പടുത്തു. ഇരുവരും ചേര്‍ന്ന് 89 റണ്‍സിന്റെ കൂട്ടുകെട്ടാണ് പടുത്തുയര്‍ത്തിയത്. ഇരുവരും പുറത്തായശേഷം 31 പന്തില്‍ പുറത്താകാതെ 42 റണ്‍സെടുത്ത റിച്ചി ബെറിങ്ടണും 11 പന്തില്‍ നിന്ന് 18 റണ്‍സെടുത്ത മാത്യു ക്രോസും ചേര്‍ന്ന് സ്‌കോര്‍ ഉയര്‍ത്തി. അധികം കഴിയും മുന്‍പേ മൈക്കല്‍ ലീസ്‌ക് 8 പന്തില്‍ അഞ്ചും റണ്‍സുമായി മടങ്ങി. പിന്നീട് 10 പന്തില്‍ നിന്ന് പുറത്താകാതെ 9 റണ്‍സെടുത്ത ക്രിസ് ഗ്രീവ്സിനെ കൂട്ടുപിടിച്ച് ക്യാപ്റ്റന്‍ ബെറിങ്ടണാണ് സ്‌കോട്ട്ലന്‍ഡ് സ്‌കോര്‍ 180-ല്‍ എത്തിച്ചത്.
മറുപടി ബാറ്റിംഗില്‍ ഓസ്ട്രേലിയക്ക് തുടക്കം മോശമായി. ഓപ്പണര്‍ ഡേവിഡ് വാര്‍ണര്‍ നാല് പന്തില്‍ ഒന്നും ക്യാപ്റ്റനും വണ്‍ഡൗണ്‍ ബാറ്ററുമായ മിച്ചല്‍ മാര്‍ഷ് 9 പന്തില്‍ എട്ടും റണ്‍സുമായി മടങ്ങി. ഗ്ലെന്‍ മാക്‌സ്വെല്ലിനും (8 പന്തില്‍ 11) തിളങ്ങാനായില്ല. ഇതിന് ശേഷം നാലാം വിക്കറ്റ് കൂട്ടുകെട്ടില്‍ ട്രാവിസ് ഹെഡ്-മാര്‍ക്കസ് സ്റ്റോയിനിസ് സഖ്യമാണ് ഓസ്ട്രേലിയയെ മത്സരത്തിലേക്ക് തിരികെ കൊണ്ടുവന്നത്. 80 റണ്‍സാണ് ഈ കൂട്ടുകെട്ട് നേടിയത്. ഹെഡ് 49 പന്തുകളില്‍ 68 റണ്‍സെടുത്ത് മടങ്ങിയപ്പോള്‍ കൂറ്റനടികളുമായി സ്റ്റോയിനിസ് 29 പന്തില്‍ 59 നേടി. പിന്നീട് ആറാം വിക്കറ്റില്‍ ക്രീസിലൊന്നിച്ച ടിം ഡേവിഡും (14 പന്തില്‍ പുറത്താകാതെ 28), മാത്യൂ വെയ്ഡും (5 പന്തില്‍ പുറത്താകാതെ 4) ചേര്‍ന്ന് രണ്ട് പന്തുകള്‍ ബാക്കിനില്‍ക്കേ ഓസീസിന് ജയത്തിലേക്ക് നയിച്ചു.
പ്രതികരിക്കാൻ ഇവിടെ എഴുതുക: