പാലക്കാട്: തൃത്താലയില് വാഹന പരിശോധനയ്ക്കിടെ എസ് ഐയെ വണ്ടിയിടിപ്പിച്ച കേസിലെ പ്രതി അലന് പിടിയില്. പട്ടാമ്പിയില് നിന്നാണ് ഇയാളെ പൊലീസ് കസ്റ്റഡിയിലെടുത്തത്.
അപകടസമയത്ത് സുഹൃത്തായ ഒറ്റപ്പാലം സ്വദേശി അജീഷ് ആണ് ഒപ്പമുണ്ടായിരുന്നതെന്ന് അലന് മൊഴി നല്കി. അജീഷിനായി പൊലീസ് അന്വേഷണം ഊര്ജിതമാക്കി.
തൃത്താല സ്റ്റേഷനിലെ എസ്ഐ ശശി കുമാറിനെയാണ് വാഹനമിടിച്ചത്. സംഭവത്തില് വാഹനമുടമ ഞാങ്ങാട്ടിരി സ്വദേശി അഭിലാഷിനെ കസ്റ്റഡിയില് എടുത്തിരുന്നു. ജോലി തടസപ്പെടുത്തിയതിനും കൊലപാതക ശ്രമത്തിനും പൊലീസ് കേസെടുത്തിട്ടുണ്ട്.
ഇന്നലെ അര്ധരാത്രിയോടെ തൃത്താല സി ഐ യുടെ നേതൃത്വത്തില് പൊലീസ് സംഘം വാഹന പരിശോധന നടത്തവെയാണ്വെള്ളിയാങ്കല്ലില് സംശയാസ്പദമായി കാര് നിര്ത്തിയിട്ടിരിക്കുന്നത് ശ്രദ്ധയില് പെട്ടത്. പൊലീസിനെ കണ്ടതും വാഹനത്തിലുണ്ടായിരുന്നവര് വെട്ടിച്ച് കടക്കാന് ശ്രമിച്ചു. കൈ കാണിച്ചെങ്കിലും വാഹനം നിര്ത്താതെ മുന്നോട്ട് പോയി എസ്ഐയെ ഇടിച്ചു വീഴ്ത്തി. എസ്ഐയെ മനപൂര്വം വാഹനം ഇടിക്കുകയായിരുന്നുവെന്ന് തൃത്താല സിഐ പറഞ്ഞു.
സംഭവത്തില് പരിക്കേറ്റ എസ്ഐ ശശി കുന്നംകുളത്തെ സ്വകാര്യ ആശുപത്രിയില് ചികിത്സയിലാണ്. വാഹനത്തിന്റെ നമ്പര് കേന്ദ്രീകരിച്ചുളള അന്വേഷണത്തിലാണ് ക്രഷര് ഉടമ അഭിലാഷിനെ പൊലീസ് കസ്റ്റഡിയിലെടുത്തത്. ഇയാളുടെ 19 വയസുളള മകന് അലനാണ് വാഹനമോടിച്ചത്.
