ന്യൂയോര്ക്ക്: ടി20 ലോകകപ്പില് ആവേശം അവസാന ഓവറിലേക്ക് നീണ്ടപ്പോള് പാക്കിസ്ഥാനെതിരെ ടീം ഇന്ത്യയ്ക്ക് 6 റണ്സിന്റെ ഉജ്വല വിജയം. ടോസ് നഷ്ടപ്പെട്ട് ആദ്യം ബാറ്റു ചെയ്ത ഇന്ത്യയെ 19 ഓവറില് 119 റണ്സിനു പുറത്താക്കിയ പാക്കിസ്ഥാന് വിജയം ഉറപ്പിച്ചിരുന്നു. എന്നാല്, ബോളര്മാരുടെ കരുത്തില് തിരിച്ചടിച്ച ഇന്ത്യ, പാക്കിസ്ഥാനെ 20 ഓവറില് 7ന് 113 എന്ന സ്കോറില് തളച്ച് 6 റണ്സിന്റെ ആവേശജയം പിടിച്ചെടുത്തു. ജയത്തോടെ ഗ്രൂപ്പ് എയില് ഇന്ത്യ ഒന്നാമതെത്തി.
നേരത്തേ ടോസ് നഷ്ടപ്പെട്ട് ആദ്യം ബാറ്റ് ചെയ്ത ഇന്ത്യ 119റണ്സിന് ഓള്ഔട്ടായിരുന്നു. ഋഷഭ് പന്തിന്റെ പ്രകടനമാണ് ഇന്ത്യയുടെ രക്ഷക്കെത്തിയത്. മഴ മൂലം ഏകദേശം ഒരു മണിക്കൂറോളം വൈകിയാണ് മത്സരം ആരംഭിച്ചത്. ആദ്യ ഓവറിന് ശേഷം വീണ്ടും മഴയെത്തി. എന്നാല് മഴ മാറി മത്സരം ആരംഭിച്ചയുടന് തന്നെ കോലിയെ ഇന്ത്യയ്ക്ക് നഷ്ടമായി. നസീം ഷാ എറിഞ്ഞ രണ്ടാം ഓവറിലെ മൂന്നാം പന്തില് കോലി മടങ്ങി. വെറും നാല് റണ്സ് മാത്രമെടുത്ത കോലി ഉസ്മാന് ഖാന്റെ കൈകളിലൊതുങ്ങി. പിന്നാലെ മൂന്നാം ഓവറില് നായകന് രോഹിത്തും കൂടാരം കയറി. ഷഹീന് അഫ്രീദിയുടെ പന്തില് കൂറ്റനടിക്ക് ശ്രമിച്ച രോഹിത്തിന് പാളി. താരത്തെ ഹാരിസ് റൗഫ് കൈകകളിലൊതുക്കിയതോടെ ഇന്ത്യ 192 എന്ന നിലയിലേക്ക് വീണു. പിന്നീട് ഋഷഭ് പന്തും അക്ഷര് പട്ടേലും ചേര്ന്ന് സ്കോറുയര്ത്തി. ഇരുവരും ടീം സ്കോര് 50 കടത്തി.
120 റണ്സ് വിജയലക്ഷ്യത്തിലേക്ക് ബാറ്റ് വീശിയ പാകിസ്ഥാന് 20 ഓവറില് ഏഴ് വിക്കറ്റ് നഷ്ടത്തില് 113 റണ്സെടുക്കാനെ കഴിഞ്ഞുള്ളു.44 പന്തില് 31 റണ്സെടുത്ത മുഹമ്മദ് റിസ്വാനാണ് പാകിസ്ഥാന്റെ ടോപ് സ്കോറര്. നാലോവറില് 13 റണ്സ് മാത്രം വഴങ്ങി ബാബര് അസമിന്റെയും മുഹമ്മദ് റിസ്വാന്റെയും ഇഫ്തീഖര് അഹമ്മദിന്റെയും നിര്ണായക വിക്കറ്റുകളെടുത്ത ജസ്പ്രീത് ബുമ്രയാണ് ഇന്ത്യയുടെ വിജയശില്പി. ടി20 ലോകകപ്പില് ഇന്ത്യ പ്രതിരോധിക്കുന്ന ഏറ്റവും കുറഞ്ഞ സ്കോറാണിത്.
മുഹമ്മദ് റിസ്വാന് ക്രീസിലുള്ളപ്പോള് 14 ഓവറില് 80 റണ്സിലെത്തിയിരുന്ന പാകിസ്ഥാന് അവസാന ആറോവറില് 40 റണ്സായിരുന്നു ജയിക്കാന് വേണ്ടിയിരുന്നത്. എന്നാല് പതിനഞ്ചാം ഓവര് എറിയാനെത്തിയ ബുമ്ര ആദ്യ പന്തില് തന്നെ പൊരുതി നിന്ന മുഹമ്മദ് റിസ്വാനെ(44 പന്തില് 31) മനോഹരമായൊരു ഇന്സ്വിംഗറില് ക്ലീന് ബൗള്ഡാക്കിയതോടെ പാകിസ്ഥാന് പതറി. പിന്നാലെ ഹാര്ദ്ദിക് പാണ്ഡ്യ ഷദാബ് ഖാനെയും വീഴ്ത്തി പാകിസ്ഥാനെ ബാക്ക് ഫൂട്ടിലാക്കി. ഇതോടെ റണ്സ് കണ്ടെത്താന് പാടുപെട്ട പാകിസ്ഥാന് അവസാന മൂന്നോവറില് ലക്ഷ്യം 30 റണ്സായി. പതിനെട്ടാം ഓവര് എറിഞ്ഞ മുഹമ്മദ് സിറാജ് നോ ബോള് അടക്കം 9 റണ്സ് വഴങ്ങിയതോടെ ലക്ഷ്യം രണ്ടോവറില് 21 റണ്സായി. പത്തൊമ്പതാം ഓവര് എറിഞ്ഞ ബുമ്ര അവസാന പന്തില് ഇഫ്തീഖര് അഹമ്മദിനെ പുറത്താക്കി പാക് ലക്ഷ്യം അവസാന ഓവറില് 18 റണ്സാക്കി.
അര്ഷ്ദീപ് സിംഗ് എറിഞ്ഞ അവസാന ഓവറിലെ ആദ്യ പന്തില് തന്നെ ഇമാദ് വാസിമിനെ(23 പന്തില് 15) റിഷഭ് പന്ത് വിക്കറ്റിന് പിന്നില് പറന്നു പിടിച്ചു. അടുത്ത രണ്ട് പന്തില് രണ്ട് റണ്സെടുത്ത ഷഹീന് അഫ്രീദിയും നസീം ഷായും അവസാന മൂന്ന് പന്തില് ലക്ഷ്യം 16 റണ്സാക്കി. നാലാം പന്തില് ബൗണ്ടറി നേടിയ നസീം ഷാ അവസാന രണ്ട് പന്തിലെ ലക്ഷ്യം 12 റണ്സാക്കി. അഞ്ചാം പന്തും ബൗണ്ടറി കടത്തിയ നസീം ഷാക്ക് അവസാന പന്തില് സിംഗിളെടുക്കാനെ കഴിഞ്ഞുള്ളു.
ഇന്ത്യക്കായി ജസ്പ്രീത് ബുമ്ര നാലോവറില് 14 റണ്സിന് മൂന്ന് വിക്കറ്റെടുത്തപ്പോള് ഹാര്ദ്ദിക് പാണ്ഡ്യ നാലോവറില് 24 റണ്സിന് രണ്ട് വിക്കറ്റെടുത്തു.
