ന്യൂദല്ഹി :ലോക്സഭാ തെരഞ്ഞെടുപ്പ് പരാജയം സംബന്ധിച്ച മാധ്യമപ്രവര്ത്തകരുടെ ചോദ്യത്തോട് പരിഹാസവുമായി മുഖ്യമന്ത്രി പിണറായി വിജയന്. ന്യൂദല്ഹിയില് സിപിഎം പിബി യോഗത്തില് പങ്കെടുക്കാനെത്തിയപ്പോഴാണ് മുഖ്യമന്ത്രി മാധ്യമപ്രവര്ത്തകരെ പരിഹാസവുമായി നേരിട്ടത്.
കേരളത്തില് 19സീറ്റുകളില് തോറ്റത് ഭരണവിരുദ്ധവികാരമാണെന്ന് പ്രതിപക്ഷനേതാവ് പറഞ്ഞല്ലോ എന്ന ചോദ്യത്തിനായിരുന്നു മുഖ്യമന്ത്രിയുടെ പരിഹാസ രൂപേണയുള്ള മറുപടി. കാറില് നിന്ന് ഇറങ്ങിയതിന് പിന്നാലെയുളള ഈ ചോദ്യത്തോട് ദല്ഹിയില് നല്ല ചൂടാണല്ലേ എന്നാണ് മുഖ്യമന്ത്രി പ്രതികരിച്ചത്.
ലോക്സഭാ തെരഞ്ഞെടുപ്പ് പരാജയത്തെ തുടര്ന്ന്, കേരളത്തില് എല്ഡിഎഫിന് പ്രതീക്ഷിച്ച വിജയം നേടാനായില്ല.2019 ലേതിന് ഏറെക്കുറെ സമാനമായ ഫലമാണുണ്ടായത്. ജനവിധി അംഗീകരിച്ചും ആഴത്തില് പരിശോധിച്ചും ആവശ്യമായ തിരുത്തലുകള് വരുത്തിയും സംസ്ഥാന സര്ക്കാരിന്റെ പ്രവര്ത്തനങ്ങള് കൂടുതല് മികവോടെ നടപ്പാക്കുമെന്നും മുഖ്യമന്ത്രി സാമൂഹ്യമാധ്യമത്തിലൂടെ പ്രതികരിച്ചിരുന്നു.
സര്ക്കാരിനെതിരെ സംഘടിതമായുളള കുപ്രചരണങ്ങളെ പ്രതിരോധിക്കുമെന്നും ജനങ്ങള്ക്കുള്ള തെറ്റിദ്ധാരണകള് നീക്കുമെന്നും പോരായ്മകള് കണ്ടെത്തി പരിഹരിക്കുമെന്നും പിണറായി കുറിച്ചിരുന്നു. തൃശൂര് മണ്ഡലത്തില് ബിജെപി നേടിയ വിജയം ഗൗരവത്തോടെ കാണുന്നെന്നും കുറിപ്പിലുണ്ടായിരുന്നു.
