ഇടുക്കി: ഒറ്റമുറി വീട്ടില് താമസിക്കുന്ന വൃദ്ധക്ക് അര ലക്ഷം രൂപയുടെ വൈദ്യുതി ബില്, പരാതി പറഞ്ഞിട്ടും വൈദ്യുതി വിഛേദിച്ച് കെഎസ്ഇബി. കണക്കുകൂട്ടലുകളില് വൈദ്യുതി ഉപഭോഗത്തിന് ഇത്രയും ഭീമമായ തുക അടയക്കാന് പറഞ്ഞ ഭവനം കെഎസ്ഇബി കണ്ടെത്തിയത് വാഗമണിലാണ്.
വയോധികയ്ക്ക് അരലക്ഷം രൂപയുടെ വൈദ്യുതി ബില് നല്കിയ സംഭവത്തില് അന്വേഷണത്തിന് നിര്ദേശിച്ചിരിക്കുകയാണ് വൈദ്യുതി വകുപ്പ് മന്ത്രി കെ കൃഷ്ണന്കുട്ടി. ഇത് സംബന്ധിച്ച് ഉദ്യോഗസ്ഥര്ക്ക് നിര്ദേശം നല്കിയതായും അന്വേഷണത്തിന് ശേഷം ആവശ്യമെങ്കില് നടപടി സ്വീകരിക്കുമെന്നും മന്ത്രി പറഞ്ഞു
വാഗമണ് സ്വദേശി അന്നമ്മയുടേതാണ് വീട്. വീട്ടില് അന്നമ്മയും മകളുടെ മകനും മാത്രമാണ് താമസിക്കുന്നത്. വീട്ടിലാകെ മൂന്ന് ബള്ബും വല്ലപ്പോഴും തുറക്കുന്ന ഒരുടിവിയും ഫ്രിഡ്ജുമാത്രമാണ് ഉള്ളതെന്ന് അന്നമ്മ പറയുന്നു. മാസങ്ങള്ക്ക് മുന്പ് കറന്റ് ബില് കുടിശിക 46,000 രൂപ അടയ്ക്കണമെന്ന് കാണിച്ച് അന്നമ്മയ്ക്ക് കെഎസ്ഇബി ബില് നല്കിയിരുന്നു. തുടര്ന്ന് അന്നമ്മ മീറ്റര് പരിശോധിക്കണമെന്ന് കാണിച്ച് കെഎസ്ഇബി പരാതി നല്കി. പരിശോധനയില് മീറ്ററിന് കുഴപ്പമില്ലെന്നായിരുന്നു കെഎസ്ഇബിയുടെ കണ്ടെത്തല്. വീണ്ടും കുടിശിക ഉള്പ്പെടെ 49,710 രൂപ അടയ്ക്കണമെന്ന് ഉദ്യോഗസ്ഥര് നിര്ദേശിക്കുകയായിരുന്നു. ഭീമമായ ബില് ഒഴിവാക്കാന് പീരുമേട് സെക്ഷന് ഓഫീസില് എത്തി വീണ്ടും വിശദീകരണം നല്കിയെങ്കിലും ഒറ്റമുറി വീട്ടിലെ വൈദ്യുതി ബന്ധം വിശ്ചേദിക്കുയാണ് കെഎസ്ഇബി ചെയ്തത്.
എഴുപത്തിനാലുകാരിയായ അന്നമ്മ കൂലിപ്പണി ചെയ്താണു ജീവിക്കുന്നത്. ഭര്ത്താവ് വര്ഷങ്ങള്ക്കു മുന്പു മരിച്ചതിനു ശേഷം മകളുടെ മകനൊപ്പമാണ് ഇവിടെ താമസിക്കുന്നത്. മുന്പ് പരമാവധി 400 രൂപയാണ് വൈദ്യുതി ബില് ലഭിച്ചിരുന്നത്. ഇത് കൃത്യമായി അടക്കുന്നുമുണ്ടായിരുന്നു. എന്നാല് കഴിഞ്ഞ മാസം 15 ന് 49,710 രൂപയുടെ ഷോക്കടിപ്പിക്കുന്ന വൈദ്യുതി ബില്ലാണ് അന്നമ്മയുടെ കൈയിലെത്തിയത്.
