കൊല്ലം: സര്‍ക്കാര്‍ ജീവനക്കാരുടെയും അദ്ധ്യാപകരുടെയും ശമ്പളം സ്പാര്‍ക്കിലേക്ക് മാറ്റിയിട്ടും സംസ്ഥാനത്തെ പഞ്ചായത്ത്-നഗരസഭ-കോര്‍പ്പറേഷനുകളില്‍ സ്ഥിരം ജോലി നോക്കുന്ന കണ്ടിജന്റ് ജീവനക്കാരുടെ ശമ്പളം സ്പാര്‍ക്കിലേക്ക് മാറ്റിയില്ല.
ജീവനക്കാരുടെ സര്‍വീസ് ബുക്ക് ഇ-സര്‍വീസ് ബുക്കിലാക്കാനും നടപടിയായിട്ടില്ല. ഇപ്പോഴും പഴയ രീതിയിലുള്ള ബുക്ക് തന്നെയയാണ്. സര്‍ക്കാര്‍ വകുപ്പുകളില്‍ 2023 ഡിസംബര്‍ മാസത്തിനകം ഇ-സര്‍വീസ് ബുക്ക് നടപ്പിലാക്കണമെന്ന് സര്‍ക്കാര്‍ ഉത്തരവിട്ടിരുന്നു. കണ്ടിജന്റ് ജീവനക്കാര്‍ക്ക് പെന്‍ നമ്പര്‍ പോലും ലഭിച്ചിട്ടില്ല.
സംസ്ഥാനത്തെ വിവിധ നഗരസഭ, പഞ്ചായത്ത്, മുനിസിപ്പാലിറ്റി, കോര്‍പറേഷന്‍ എന്നിവിടങ്ങളില്‍ ജോലി ചെയ്യുന്ന കണ്ടിജന്റ് ജീവനക്കാര്‍ക്ക് സ്ഥാനക്കയറ്റം, തസ്തിക മാറ്റം, പ്രൊമോഷന്‍ എന്നിവയൊന്നും സര്‍ക്കാര്‍ നല്കുന്നതില്ലെന്നും ജീവനക്കാര്‍ ആരോപിക്കുന്നു.
സ്‌പെഷല്‍ റൂള്‍സ് തയാറാക്കുന്നതിലെ കാലതാമസം കാരണമാണ് ജീവനക്കാര്‍ക്ക് ആനുകൂല്യങ്ങള്‍ ലഭിക്കാത്തത്. എന്നാല്‍ മറ്റ് വകുപ്പുകളിലെ കണ്ടിജന്റ് ജീവനക്കാര്‍ക്ക് 10 ശതമാനം സംവരണം നല്കി സ്ഥാനക്കയറ്റവും പ്രൊമോഷനും നല്കുന്നുമുണ്ട്.
സ്‌പെഷല്‍ റൂള്‍സ് തയാറാക്കാന്‍ 22ലും 23ലും വകുപ്പ് മന്ത്രിക്ക് ജീവനക്കാര്‍ നിവേദനം നല്കിയിരുന്നെങ്കിലും നടപടിക്രമങ്ങള്‍ ഒച്ചിഴയുന്ന വേഗത്തിലാണ്. കൂടാതെ കണ്ടിജന്റ് ജീവനക്കാരുടെ പേര് മാറ്റി മുനിസിപ്പല്‍ ഹെല്‍ത്ത് വര്‍ക്കര്‍ എന്നാക്കി കൊണ്ടുള്ള ഉത്തരവും ഇതുവരെ സര്‍ക്കാര്‍ പുറത്തിറക്കിയിട്ടില്ല. കണ്ടിജന്റ് ജീവനക്കാരില്‍ എസ്എസ്എല്‍സി മുതല്‍ ബിരുദ, ബിരുദാനന്തര യോഗ്യതയുള്ളവര്‍ വരെ ജോലി ചെയ്യുന്നുണ്ട്. പിഎസ്‌സി റാങ്ക് ലിസ്റ്റില്‍ നിന്ന് നിയമനം നടത്തുന്നത് പോലെ തന്നെയാണ് കണ്ടിജന്റ് ജീവനക്കാരുടെ നിയമനവും.
കണ്ടിജന്റ് ജീവനക്കാര്‍ക്ക് എല്ലാ ആനുകൂല്യങ്ങളും ലഭ്യമാക്കാന്‍ ബന്ധപ്പെട്ട വകുപ്പുകള്‍ ഉടനെ നടപടി സ്വീകരിക്കണമെന്നാണ് ജീവനക്കാരുടെ ആവശ്യം.
പ്രതികരിക്കാൻ ഇവിടെ എഴുതുക: