കണ്ണൂര്‍ : വിമാനത്താവളത്തിലൂടെ എയര്‍ഹോസ്റ്റസുമാരെ ഉപയോഗിച്ച് സ്വര്‍ണം കടത്തിയത് കൊടുവള്ളി സ്വദേശിക്ക് വേണ്ടിയാണെന്ന് അറസ്റ്റിലായ സുഹൈല്‍ മൊഴി നല്‍കി.ഒരു കോടിയോളം രൂപ മൂല്യമുള്ള വിദേശ കറന്‍സി കടത്തിയതും ഇയാള്‍ക്ക് വേണ്ടിയാണെന്ന് സുഹൈല്‍ പറഞ്ഞു. ഇയാള്‍ക്കായി അന്വേഷണം ഊര്‍ജിതമാക്കിയിരിക്കുകയാണ് ഡയറക്ടറേറ്റ് ഓഫ് റവന്യൂ ഇന്റലിജന്‍സ്.
എയര്‍ ഇന്ത്യാ എക്സ്പ്രസിലെ സീനിയര്‍ ക്യാബിന്‍ ക്രൂ ആണ് സുഹൈല്‍. അടുത്തിടെ സ്വര്‍ണം കടത്തിയതിന് കാബിന്‍ ക്രൂ സുരഭി ഖാത്തൂണ്‍ പിടിയിലായതോടെയാണ് സുഹൈലിലേക്ക് അന്വേഷണം എത്തിയത്. ഇയാള്‍ ആവശ്യപ്പെട്ട പ്രകാരമാണ് സ്വര്‍ണം കടത്തിയതെന്ന് പശ്ചിമ ബംഗാള്‍ സ്വദേശിനി സുരഭി മൊഴി നല്‍കിയത്.
നാട്ടിലെ വിമാനതാവളങ്ങളില്‍ എത്തിച്ചതില്‍ ഏറെയും ഒമാന്‍, ഖത്തര്‍ റിയാലുകളും അമേരിക്കന്‍ ഡോളറുമായിരുന്നു. കൊടുവളളി സ്വദേശി ബാബുവിന് വേണ്ടിയാണ് സ്വര്‍ണവും വിദേശ കറന്‍സിയും കടത്തിയതെന്ന് ഡിആര്‍ഐ വ്യക്തമാക്കുന്നു.വിദേശത്ത് നിന്നും നാട്ടില്‍ എത്തിക്കുന്ന കറന്‍സി കൈമാറിയിരുന്നത് കൊച്ചിയിലെ മാളില്‍ വച്ചായിരുന്നു.
സ്വര്‍ണം കടത്തിയ എയര്‍ഹോസ്റ്റസിന് നല്‍കാന്‍ ബാബു ഐ ഫോണ്‍ കൈമാറിയിരുന്നു. ഈ ഐ ഫോണ്‍ ഡിആര്‍ഐ പിടിച്ചെടുത്തു. കള്ളക്കടത്തില്‍ കൂടുതല്‍ എയര്‍ ഹോസ്റ്റസുമാര്‍ക്ക് പങ്കുണ്ടെന്നാണ് വിവരം. ഈ സാഹചര്യത്തില്‍ കൂടുതല്‍ എയര്‍ഹോസ്റ്റസുമാരിലേക്ക് അന്വേഷണം നീളും.
പ്രതികരിക്കാൻ ഇവിടെ എഴുതുക: