ആലപ്പുഴ : പൊലീസുകാരന് ഹോട്ടല് അടിച്ചു തകര്ത്ത കേസില് വധശ്രമത്തിന് കേസ്. ചങ്ങനാശേരി ട്രാഫിക് പൊലീസ് സ്റ്റേഷനിലെ സിപിഒ ആലപ്പുഴ വാടക്കല് സ്വദേശി സി എഫ് ജോസഫിനെതിരെ ആലപ്പുഴ സൗത്ത് പൊലീസാണ് കേസ് രജിസ്റ്റര് ചെയ്തത്. അതേസമയം സംഭവത്തെപ്പറ്റിയുള്ള റിപ്പോര്ട്ട് കിട്ടിയാലുടന് വകുപ്പ് തല നടപടിയെടുക്കുമെന്ന് കോട്ടയം എസ് പി ജെ കാര്ത്തിക് അറിയിച്ചു.
ആലപ്പുഴ കളര്കോടുള്ള അഹലന് കുഴിമന്തി ഹോട്ടലില് നിന്ന് കുഴിമന്തി കഴിച്ച മകന് ഭക്ഷ്യവിഷബാധ ഉണ്ടായി എന്ന് ആരോപിച്ചായിരുന്നു പൊലീസുകാരന് ആക്രമണം നടത്തിയത്. രണ്ടുദിവസം മുമ്പ് ബൈക്കില് വടിവാളുമായി എത്തി ഹോട്ടലിനുള്ളിലേക്ക് ഇടിച്ചു കേറ്റി ഹോട്ടല് അടിച്ചു തകര്ക്കുകയായിരുന്നു.
സംഭവത്തില് വധശ്രമം അടക്കം ഗുരുതര വകുപ്പുകള് ചുമത്തിയ ആലപ്പുഴ സൗത്ത് പൊലീസ് പ്രതി സി എഫ് ജോസഫിനെ ശനിയാഴ്ച വൈകിട്ടോടെ കോടതിയില് ഹാജരാക്കും. ഹോട്ടലില് വിരല് അടയാള വിദഗ്ധരും ഫോറന്സിക് സംഘവും തെളിവെടുത്തു. പ്രതി മദ്യലഹരിയില് ആയിരുന്നു ആക്രമണം നടത്തിയത്. ആറ് ലക്ഷം രൂപയുടെ നഷ്ടമുണ്ടായെന്ന് ഹോട്ടലുടമ പൊലീസിന് മൊഴി നല്കി.
ഇയാളുടെ മുന് കാല ചെയ്തികളെ കുറിച്ച് അന്വേഷിക്കാന് സ്പെഷ്യല് ബ്രാഞ്ച് ഡിവൈഎസ്പിയോട് കോട്ടയം എസ് പി ആവശ്യപ്പെട്ടു. ഇന്ന് തന്നെ പ്രാഥമിക റിപ്പോര്ട്ട് നല്കണം. ഹോട്ടല് തകര്ത്തത്തില് ആലപ്പുഴ എസ് പിയുടെ റിപ്പോര്ട്ടും തേടി.
