തൃശൂര്‍: പേരാമംഗലത്ത് കെഎസ്ആര്‍ടിസി സൂപ്പര്‍ ഫാസ്റ്റ് ബസില്‍ പ്രസവിച്ച കുട്ടിക്ക് അമല എന്ന് പേരിട്ടു. തൃശൂര്‍ അമല മെഡിക്കല്‍ കോളേജ് ആശുപത്രി ജീവനക്കാരാണ് യുവതിയുടെ പ്രസവവെടുത്തത്. ഇവിടെ തന്നെയായിരുന്നു അമ്മയുടെയും കുഞ്ഞിന്റെയും പ്രസവാനന്തര ശുശ്രൂഷയും. ഇവര്‍ ഇന്ന് ആശുപത്രി വിടും.
അങ്കമാലിയില്‍ നിന്നും തൊട്ടില്‍ പാലത്തിന് പോവുകയായിരുന്ന കെഎസ്ആര്‍ടി ബസിലാണ് വ്യാഴാഴ്ച ഉച്ചയ്‌ക്ക് പന്ത്രണ്ടേ മുക്കാലോടെ തിരുനാവായ സ്വദേശിനി സെറീന ( 36) പ്രസവിച്ചത്. യാത്രക്കിടെ യുവതിക്ക് പ്രസവ വേദന അനുഭവപ്പെട്ടതോടെ ഫോണില്‍ അറിയിച്ച ശേഷം ബസ് ഏറ്റവും അടുത്തുള്ള അമല ആശുപത്രിയിലേക്ക് എത്തിക്കുകയായിരുന്നു.
ബസ് വന്ന് നിന്നതും ഡോക്ടര്‍മാരും നഴ്‌സുമാരും ബസിനുള്ളിലേക്ക് കയറി. യുവതിയെ പുറത്തെടുക്കാനുള്ള സ്ട്രക്ചറും തയാറാക്കി പുറത്ത് നിര്‍ത്തി. ആശുപത്രിയിലേക്ക് മാറ്റും മുമ്പ് തന്നെ ബസില്‍ വച്ച് പരിശോധിച്ചപ്പോള്‍ പ്രസവം തുടങ്ങിയിരുന്നു. ഇതോടെ യാത്രക്കാരെയിറക്കി പെട്ടെന്ന് തന്നെ കെഎസ്ആര്‍ടി ബസ് പ്രസവ മുറിയാക്കി.
ആശുപത്രിയിലെ നഴ്‌സുമാരും ഡോക്ടറും ബസിനുള്ളില്‍ കയറി അരമണിക്കൂറിനുള്ളില്‍ കുഞ്ഞിനെ പുറത്തെടുത്ത് പൊക്കിള്‍ കൊടി മുറിച്ചു. ബസിലെ പ്രസവാനന്തരം അമ്മയെയും കുഞ്ഞിനെയും ഐസിയുവിലേക്ക് മാറ്റി. യുവതിയുടെയും കുഞ്ഞിന്റെയും തുടര്‍ ചികിത്സ അമല ആശുപത്രി സൗജന്യമായി നല്‍കി.
പ്രതികരിക്കാൻ ഇവിടെ എഴുതുക: