വിഴിഞ്ഞം: മീന് പിടിക്കാന് പോയി കാണാതായ രണ്ടു പേരെ ഉള്ക്കടലില് നിന്നും തെരച്ചില് നടത്തിയ മത്സ്യത്തൊഴിലാളികള് കണ്ടെത്തി. പുതിയതുറ സ്വദേശികളായ അനീഷ്, നിശാന്ത് എന്നിവരെയാണ് രക്ഷാപ്രവര്ത്തനത്തിന് രാത്രിയില് വള്ളമിറക്കിയ വിഴിഞ്ഞം സ്വദേശി ഡേവിഡ്സണും സംഘവും കണ്ടെത്തിയത്.
ശക്തമായ കടല്ക്ഷോഭത്തെ വകവയ്ക്കാതെയാണ് ഇവര് തെരച്ചില് നടത്തി കണ്ടെത്തിയത്. തിങ്കളാഴ്ച രാത്രിയില് മീന് പിടിക്കാന് പോയ അഞ്ചംഗ സംഘത്തിലെ രണ്ടു പേരായിരുന്നു അനീഷും നിശാന്തും. ഇവരുടെ ജീവനുകളുടെ രക്ഷയ്ക്കായി വിഴിഞ്ഞം സ്വദേശി ഡേവിഡ്സണും സുഹൃത്ത് ജോണ്, ഷാലു എന്നിവര് പ്രതികൂല കാലാവസ്ഥയും അവഗണിച്ച് വള്ളമിറക്കി.
അന്വേഷണം തുടരുന്നതിനിടയില് കുളച്ചല് തീരത്തിനുമപ്പുറം ഉള്ക്കടലില് ഒഴുകി നടക്കുന്ന ഒരു വള്ളത്തിലുള്ള ലൈറ്റിന്റെ അരണ്ട പ്രകാശം സംഘത്തിന്റെ ശ്രദ്ധയില്പ്പെട്ടു. വെട്ടം നോക്കി വള്ളമോടിച്ച തെരച്ചിലുകാര് കാറ്റും മഴയും കൊണ്ട് അവശരായ അനീഷിനെയും നിശാന്തിനെയും കണ്ടെത്തി. തുടര്ന്ന് ഇന്നലെ പുലര്ച്ചയോടെ ഇവരെ വിഴിഞ്ഞം തുറമുഖത്ത് എത്തിച്ചു.
