തൃശൂര്: ഫിഷറീസ് വകുപ്പിന്റെ പ്രധാനമന്ത്രി മത്സ്യ സമ്പദ് യോജന പദ്ധതി പ്രകാരം മതിലകം തൃപ്പേക്കുളത്ത് കനോലി കനാലില് കൂടുകെട്ടി കൃഷി ചെയ്തിരുന്ന മത്സ്യങ്ങള് ചത്തുപൊങ്ങി.ബുധനാഴ്ച രാവിലെയാണ് മത്സ്യങ്ങള് കൂട്ടത്തോടെ ചത്തുപൊങ്ങിയത്. മതിലകം സ്വദേശി ഖദീജാബി മാഹിന്റെ മത്സ്യകൃഷിയാണ് നശിച്ചത്.
അഞ്ചര ലക്ഷം രൂപ ചെലവാക്കിയത് നഷ്ടത്തിലായെന്നും വീട്ടുകാര് പറഞ്ഞു. രണ്ടായിരം കളാഞ്ചിയും ആയിരം കരിമീന് കുഞ്ഞുങ്ങളെയുമാണ് പുഴയില് കൂടുകെട്ടി വളര്ത്തിയത്. ഇവയില് പകുതിയിലധികവും ചത്തു.
കനത്ത മഴയില് കനോലി കനാലില് വെള്ളത്തിന്റെ കുത്തൊഴുക്ക് കൂടിയതും മാലിന്യം നിറഞ്ഞ വെള്ളം ഒഴുകിയെത്തിയതും മത്സ്യങ്ങള് ചത്തുപൊന്താന് കാരണമായെന്ന് അധികൃതര് പറഞ്ഞു.
