മലപ്പുറം: തൊഴില് അന്വേഷിച്ച് അബുദാബിയില് നിന്ന് തായ്ലന്ഡിലെത്തിയ മലപ്പുറം വള്ളിക്കാപ്പറ്റ സ്വദേശികളായ രണ്ട് യുവാക്കളെ തട്ടിക്കൊണ്ടു പോയി. യുവാക്കള് ഇപ്പോള് മ്യാന്മാറിലെ ഓണ്ലൈന് തട്ടിപ്പ് സംഘങ്ങളുടെ കസ്റ്റഡിയിലാണെന്നാണ് ബന്ധുക്കള്ക്ക് ലഭിച്ച വിവരം. സംഭവത്തില് ബന്ധുക്കള് വിദേശകാര്യ മന്ത്രാലയത്തിലുള്പ്പെടെ പരാതി നല്കി.
മാര്ച്ച് 27നാണ് ശുഹൈബ്, സഫീര് എന്നിവര് സന്ദര്ശക വിസയില് ദുബായിലെത്തിയത്. തായ്ലന്റ് ആസ്ഥാനമായ കമ്പനിയിയില് ജോലി ഒഴിവുണ്ടെന്നറിഞ്ഞ് അപേക്ഷ നല്കി. ഓണ്ലൈന് അഭിമുഖം കഴിഞ്ഞ് ജോലി ലഭിച്ചതായുളള അറിയിപ്പും തായ്ലന്ഡിലേക്കുള്ള വിമാനടിക്കറ്റുമെത്തി.
ഈ മാസം 22ന് തായ് ലന്ഡില് വിമാനമിറങ്ങിയ ഇവരെ ഏജന്റ് വാഹനത്തില് സായുധ സംഘത്തിന്റെ നിയന്ത്രണത്തിലുള്ള അജ്ഞാത കേന്ദ്രത്തിലേക്ക് കൊണ്ടു പോവുകയായിരുന്നുവെന്നാണ് ബന്ധുക്കള് പറയുന്നത്. ഇടയ്ക്ക് ഫോണില് ബന്ധപ്പെട്ടപ്പോഴാണ് ഇരുവരുടെയും കുടുംബം ഇക്കാര്യം അറിഞ്ഞത്.
ബാങ്ക് അക്കൗണ്ട് ഹാക്ക് ചെയ്യുന്നതുള്പ്പെടെ കാര്യങ്ങള് ചെയ്യാനാണ് ഇവരെ ഉപയോഗിക്കുന്നതെന്നാണ് വിവരം. മലയാളികളുള്പ്പെടെ നിരവധിയാളുകള് തട്ടിപ്പ് സംഘങ്ങളുടെ കെണിയില് പെട്ടിട്ടുണ്ടെന്ന് യുവാക്കള് വീട്ടുകാരെ അറിയിച്ചിട്ടുണ്ട്.
