കോട്ടയം: ചങ്ങനാശ്ശേരിയിൽ പെൺകുട്ടിയോട് അസഭ്യം പറഞ്ഞത് ചോദ്യം ചെയ്തതിന് പിന്നാലെ വ്യാപാരികൾക്ക് നേരെ യുവാവിന്റെ മുളകുപൊടി സ്പ്രേ ആക്രമണം. യുവാവിനെ പൊലീസ് കസ്റ്റഡിയിലെടുത്തു. സംഭവം അറിഞ്ഞിട്ടും പൊലീസ് സ്ഥലത്തെത്താൻ വൈകിയതായി വ്യാപാരികൾ ആരോപണം ഉന്നയിച്ചു.
ഇന്ന് രാത്രി 9 മണിയ്ക്ക് ശേഷമാണ് സംഭവം നടന്നത്. മാതാപിതാക്കൾക്കൊപ്പം ടൗണിലെത്തിയതായിരുന്നു യുവതി. ഈ യുവതിയോട് യുവാവ് മോശമായി പെരുമാറുന്നത് ചില വ്യാപാരികൾ ശ്രദ്ധിക്കുകയും ചോദ്യം ചെയ്യുകയുമായിരുന്നു. ഇയാളെ നാട്ടുകാർ പിടിച്ചുവച്ച സമയത്താണ് മറ്റൊരു യുവാവ് ബൈക്കിലെത്തി എല്ലാവർക്കും നേരെ മുളകുപൊടി സ്പ്രേ ചെയ്യുകയായിരുന്നു.
തുടർന്ന് നാട്ടുകാർ ചേർന്ന് ഈ അക്രമിയേയും കീഴ്പ്പെടുത്തി പിടിച്ചുവച്ചു. എന്നാൽ സംഭവം പൊലീസിൽ അറിയിച്ചിട്ടും പൊലീസ് സ്ഥലത്തെത്താൻ വൈകിയെന്നാണ് നാട്ടുകാരുടെ പരാതി.
