മോസ്‌കോ: ഉക്രൈനുമായുള്ള യുദ്ധം നിര്‍ത്തിവയ്‌ക്കാന്‍ റഷ്യന്‍ പ്രസിഡന്റ് വ്‌ലാദിമിര്‍
പുടിന് തയാറാണെന്ന് റിപ്പോര്‍ട്ട്. നിലവില്‍ പിടിച്ചെടുത്ത പ്രദേശങ്ങള്‍ അംഗീകരിച്ചുകൊണ്ടും പോരാട്ടം നടക്കുന്ന മേഖലകളില്‍ സാന്നിധ്യം നിലനിര്‍ത്തിക്കൊണ്ടുമുള്ള വെടിനിര്‍ത്തലിനാണ് പുടിന് തയാറാകുന്നതെന്ന് റോയിട്ടേഴ്‌സ് റിപ്പോര്‍ട്ട് ചെയ്തു. നിര്‍ദേശത്തോട് ഉക്രൈയ്നും അമേരിക്കയും യൂറോപ്യന്‍ രാജ്യങ്ങളും അനുകൂലമായി പ്രതികരിക്കുന്നില്ലെങ്കില്‍ യുദ്ധം തുടരാനാണ് പുടിന്റെ തീരുമാനമെന്നും റിപ്പോര്‍ട്ടില്‍ പറയുന്നു.
സമാധാന ചര്‍ച്ചകളെ യൂറോപ്യന്‍ രാജ്യങ്ങള്‍ വഴിതിരിച്ചുവിടാന്‍ ശ്രമിക്കുന്നതിലും ഉക്രൈന്‍ പ്രസിഡന്റ് വ്‌ളോദിമീര്‍ സെലന്‍സ്‌കി ചര്‍ച്ചയില്ലെന്ന് പ്രഖ്യാപിച്ചതിലും പുടിന് കടുത്ത രോഷത്തിലാണെന്നാണ് റിപ്പോര്‍ട്ട്. എത്ര നാളെടുത്താലും യുദ്ധം തുടരാന്‍ പുടിനാകും. എങ്കിലും വെടിനിര്‍ത്തലിനും യുദ്ധം മരവിപ്പിക്കാനും അദ്ദേഹം തയാറാണ്, മുതിര്‍ന്ന റഷ്യന്‍ ഉദ്യോഗസ്ഥന്‍ ഇങ്ങനെ പറഞ്ഞതായി റോയിട്ടേഴ്‌സിന്റെ റിപ്പോര്‍ട്ടിലുണ്ട്.
അതേസമയം, തെറ്റിദ്ധരിപ്പിക്കുന്ന സൂചനകള്‍ നല്കി അടുത്ത മാസം സ്വിറ്റ്‌സര്‍ലന്‍ഡില്‍ ഉക്രൈന്റെ നേതൃത്വത്തില്‍ ചേരുന്ന സമാധാന ഉച്ചകോടിയെ വഴിതിരിച്ചുവിടാനുള്ള ശ്രമമാണ് പുടിന് നടത്തുന്നതെന്ന് ഉക്രൈന്‍ വിദേശകാര്യ മന്ത്രി ദിമിത്ര കുലേബ എക്‌സില്‍ പ്രതികരിച്ചു. ആക്രമണം അവസാനിപ്പിക്കാന്‍ പുടിന് ആഗ്രഹമില്ല. സമാധാനം തിരഞ്ഞെടുക്കാന്‍ ലോകരാജ്യങ്ങള്‍ ഒന്നിച്ച് സമ്മര്‍ദം ചെലുത്തിയാല്‍ മാത്രമേ അദ്ദേഹം തയാറാകൂ, കുലേബ പറഞ്ഞു.
യുദ്ധം അവസാനിപ്പിക്കുന്നതുമായി ബന്ധപ്പെട്ട് അന്താരാഷ്‌ട്ര സമൂഹത്തിന്റെ അഭിപ്രായങ്ങള്‍ ഏകീകരിക്കാന്‍ ജൂണിലാണ് സ്വിറ്റ്‌സര്‍ലന്‍ഡില്‍ സമാധാന ഉച്ചകോടി ചേരുന്നത്. സ്വിറ്റ്‌സര്‍ലന്‍ഡ് റഷ്യയെ ക്ഷണിച്ചിട്ടില്ല. സെലന്‍സ്‌കിയുടെ നേതൃത്വത്തില്‍ നടക്കുന്ന ചര്‍ച്ചയില്‍ പുടിന് പങ്കെടുക്കരുതെന്ന് ഉക്രൈനും ആവശ്യപ്പെട്ടിട്ടുണ്ട്.
പ്രതികരിക്കാൻ ഇവിടെ എഴുതുക: