തൊടുപുഴ: തങ്ങള്‍ കൂടി പങ്കാളിയായ പിണറായി സര്‍ക്കാരിന്റെ കാലത്തും ബാര്‍ കോഴ ഉണ്ടായതില്‍ ഞെട്ടി സിപിഐ. പാര്‍ട്ടി ഇടുക്കി ജില്ലാ സെക്രട്ടറി കെ. കെ. ശിവരാമനാണ് ഫേസ്ബുക്കില്‍ നടുക്കം പ്രകടിപ്പിച്ചത്. ഇക്കാര്യത്തില്‍ അടിയന്തര അന്വേഷണം വേണമെന്നും അദ്ദേഹം ആവശ്യപ്പെട്ടു. ശിവരാമന്റെ ഫേസ് ബുക്ക് പോസ്റ്റ്:
രാവിലെ മുതല്‍ കേരളത്തിലെ ദൃശ്യമാധ്യമങ്ങള്‍ പുറത്തുവിടുന്ന വാര്‍ത്ത അത്യന്തം ഗൗരവമുള്ളതാണ്. മദ്യ നയത്തില്‍ ഇളവ് വരുത്താന്‍ ബാറുടമകള്‍ രണ്ടര ലക്ഷം രൂപ വീതം നല്കണമെന്നാണ് ബാര്‍ ഉടമ സംഘത്തിന്റെ സംസ്ഥാന വൈസ് പ്രസിഡന്റ് അനിമോന്റെതായി പ്രചരിക്കുന്ന ശബ്ദ സന്ദേശം. നമുക്കായി ഇളവുകള്‍ നല്കുമ്പോള്‍ കൊടുക്കേണ്ടത് കൊടുക്കണം എന്നാണ് പറയുന്നത്. എന്നുപറഞ്ഞാല്‍ സര്‍ക്കാരിന്റെ മദ്യ നയത്തില്‍ നമുക്ക് അനുകൂലമായ മാറ്റം വരണമെങ്കില്‍ കൊടുക്കേണ്ടത് കൊടുക്കണം! ആര്‍ക്ക് ? കേരളത്തില്‍ ആയിരത്തോളം ബാറുകള്‍ ഉണ്ട്. ഈ ബാറുകള്‍ എല്ലാം രണ്ടര ലക്ഷം രൂപ വീതം നല്കിയാല്‍ 250 കോടിയാകും. ഈ പണം എവിടേക്കാണ് ഒഴുകിയെത്തുന്നത് ? ഖജനാവിലേക്ക് അല്ലെന്നത് വ്യക്തം! പണമുണ്ടെങ്കില്‍ സര്‍ക്കാര്‍ നയത്തെ സ്വാധീനിക്കാന്‍ കഴിയുമെന്ന് ഒരു ബാര്‍ ഉടമ പറയുന്നത് ഗൗരവമുള്ള കാര്യമാണ്, ഇത് സംബന്ധിച്ച അടിയന്തര അന്വേഷണം വേണം.
എല്‍ഡിഎഫ് സര്‍ക്കാരിന്റെ മുഖം വികൃതമാക്കാന്‍ കെട്ടിച്ചമച്ച കള്ളക്കഥയാണോയെന്ന് അറിയണം, സര്‍ക്കാരിന്റെ മദ്യ നയത്തില്‍ വരുത്തുന്ന ഏതൊരു മാറ്റവും പൊതു താല്‍പര്യം കണക്കിലെടുത്താണ്. അങ്ങനെ തന്നെയാവണം താനും. ബാര്‍ ഉടമകളുടെ താല്പര്യങ്ങള്‍ സംരക്ഷിക്കാന്‍ ആണെന്ന് വരുത്തി തീര്‍ക്കുന്നത് അപലപനീയമാണ്. അനിമോന്റെ വെളിപ്പെടുത്തലുകളെ കുറിച്ച് അടിയന്തര അന്വേഷണം നടത്താന്‍ ഗവണ്‍മെന്റ് തയാറാവണം.’
പ്രതികരിക്കാൻ ഇവിടെ എഴുതുക: