ചെന്നൈ : മുല്ലപ്പെരിയാറില് പുതിയ അണക്കെട്ട് നിര്മിക്കാന് പാരിസ്ഥിതിക അനുമതി നേടാനുള്ള കേരളത്തിന്റെ നീക്കം അനുവദിക്കരുതെന്ന് തമിഴ്നാട് മുഖ്യമന്ത്രി എം.കെ.സ്റ്റാലിന്. ഇക്കാര്യം ആവശ്യപ്പെട്ട് അദ്ദേഹം കേന്ദ്ര പരിസ്ഥിതി മന്ത്രാലയത്തിനു കത്തു നല്കി.
സുപ്രീംകോടതി ഉത്തരവു മറികടന്നാണ് കേരളത്തിന്റെ നീക്കമെന്നാണ് സ്റ്റാലിന്റെ ആരോപണം.പദ്ധതിയുമായി മുന്നോട്ടു പോയാല് തമിഴ്നാട് കോടതിയലക്ഷ്യ നടപടികള് ആരംഭിക്കുമെന്ന് കത്തില് പറയുന്നു.
പാരിസ്ഥിതിക ആഘാത പഠനം നടത്തണമെന്ന കേരളത്തിന്റെ ആവശ്യം പരിസ്ഥിതി മന്ത്രാലയത്തിന്റെ വിദഗ്ധ സമിതി 28നു നടക്കാനിരിക്കുന്ന യോഗത്തില് പരിഗണനാ വിഷയമായി(ടേംസ് ഓഫ് റഫറന്സ്) ഉള്പ്പെടുത്തിയതാണ് സ്റ്റാലിന് ഇപ്പോള് രംഗത്ത് വരാന് കാരണം.
തമിഴ്നാട് സര്ക്കാരിന്റെ അനുമതിയില്ലാതെ അണക്കെട്ട് നിര്മാണത്തിന് കേരളത്തിന് അനുമതി നല്കരുതെന്ന് ആവശ്യപ്പെട്ടുളള കത്തും തമിഴ്നാട് ഔദ്യോഗികമായി പരിസ്ഥിതി മന്ത്രാലയത്തിനു നല്കും.
മുല്ലപ്പെരിയാറില് പുതിയ അണക്കെട്ട് നിര്മിക്കാനുള്ള വിശദ പദ്ധതി റിപ്പോര്ട്ട് (ഡിപിആര്) ഒരു മാസത്തിനകം പൂര്ത്തിയാക്കാന് കേരളം തീരുമാനിച്ചിരുന്നു. പുതിയ അണക്കെട്ട് നിര്മിക്കാന് കുറഞ്ഞത് 7 വര്ഷം വേണമെന്നാണ് ജലസേചന വകുപ്പിന്റെ നിഗമനം. എന്നാല്, അടിയന്തരമായി നിര്മിക്കണമെന്ന് ആവശ്യപ്പെട്ടാല് 5 വര്ഷത്തിനകം നിര്മാണം പൂര്ത്തിയാക്കാനാകുമെന്നാണ് കരുതുന്നത്. പുതിയ അണക്കെട്ടിന്റെ രൂപരേഖ തയാറാക്കി. പരിസ്ഥിതി ആഘാത പഠനം, വനം വന്യജീവി വകുപ്പിന്റെ അനുമതി എന്നിവ ഇനി ലഭിക്കേണ്ടതുണ്ട്.
