തിരുവനന്തപുരം: വിരമിക്കാനിരിക്കെ കൈക്കൂലി കേസിൽ ഉദ്യോഗസ്ഥൻ അറസ്റ്റിൽ. തിരുവനന്തപുരം കോർപ്പറേഷൻ തിരുവല്ലം സോണൽ ഓഫീസിലെ സെക്ഷൻ ക്ലർക്ക് അനിൽകുമാറിനെയാണ് വിജിലൻസ് പിടികൂടിയത്. ഇന്ന് വൈകിട്ട് തിരുവല്ലത്തെ സോണൽ ഓഫീസിൽ വെച്ച് പരാതിക്കാരനിൽ നിന്നും ആയിരം രൂപ കൈക്കൂലി വാങ്ങുന്നതിനിടെയാണ് ഉദ്യോഗസ്ഥനെ അറസ്റ്റ് ചെയ്തത്.
അനധികൃത നിർമ്മാണം പൊളിക്കുന്നതായി ബന്ധപ്പെട്ട പലതവണ ഓഫീസിൽ കയറിയെങ്കിലും കാര്യം നടക്കാതെ വന്നതോടെയാണ് പരാതിക്കാരൻ വിജിലൻസിൽ ഉദ്യോഗസ്ഥനെതിരെ പരാതി നൽകിയത്. തുടർന്ന് വിജിലൻസ് നിർദേശ പ്രകാരം ഇന്ന് ഉച്ചയ്‌ക്കുശേഷം മൂന്നു മണിക്ക് പരാതിക്കാരൻ ഓഫീസിലെത്തി തുക കൈമാറുകയായിരുന്നു.
ഇതിനിടെ സ്ഥലത്തുണ്ടായിരുന്ന വിജിലൻസ് സംഘം അനിൽകുമാറിനെ കൈക്കൂലി പണം സഹിതം പിടികൂടുകയായിരുന്നു. വിഴിഞ്ഞം പൂവാർ സ്വദേശിയാണ് അനിൽകുമാർ. ജോലിയിൽ നിന്ന് വിരമിക്കാൻ ആറ് ദിവസം ബാക്കിയുള്ളപ്പോഴാണ് വിജിലൻസിൻറെ അറസ്റ്റ്.
പ്രതികരിക്കാൻ ഇവിടെ എഴുതുക: