കോൺഗ്രസും എസ്പിയും പാകിസ്ഥാൻ അനുഭാവികൾ : പ്രധാനമന്ത്രി മോദി

ബസ്തി : കോൺഗ്രസിനെയും സമാജ്‌വാദി പാർട്ടിയെയും പാക്കിസ്ഥാന്റെ അനുഭാവികളെന്ന് വിളിച്ച പ്രധാനമന്ത്രി നരേന്ദ്ര മോദി. ബിജെപിയുടെ ബസ്തി ലോക്‌സഭാ സ്ഥാനാർഥി ഹരീഷ് ദ്വിവേദിക്ക് വേണ്ടി പ്രചാരണം നടത്തുന്നതിനിടെ ഒരു തിരഞ്ഞെടുപ്പ് റാലിയിൽ സംസാരിക്കുകയായിരുന്നു അദ്ദേഹം.

പാകിസ്ഥാന്റെ ആണവോർജ്ജ പദവി ഉപയോഗിച്ച് ഈ പാർട്ടികൾ രാജ്യത്തെ ഭയപ്പെടുത്തുകയാണെന്നും അദ്ദേഹം ആരോപിച്ചു. ഒരുകാലത്ത് നമ്മെ കണ്ണുരുട്ടിയിരുന്ന പാകിസ്ഥാൻ എന്ന ഭീകരതയുടെ കാര്യം കഷ്ടത്തിലാണ്. അവിടുത്തെ ജനങ്ങൾ ധാന്യത്തിന് പോലും ബുദ്ധിമുട്ടുന്ന തരത്തിലായിക്കഴിഞ്ഞുവെന്ന് പ്രധാനമന്ത്രി പറഞ്ഞു.

ഇപ്പോൾ പാകിസ്ഥാൻ അനുഭാവികളായി ഇൻഡി മുന്നണി മാറിക്കഴിഞ്ഞു. അതിന്റെ അനുഭാവികളായ എസ്പിയും കോൺഗ്രസും രാജ്യത്തെ ഭയപ്പെടുത്തുന്ന തിരക്കിലാണെന്നും മോദി കുറ്റപ്പെടുത്തി.

ആറ്റംബോംബുള്ളതിനാൽ പാകിസ്ഥാനെ പേടിക്കണമെന്ന് അവർ പറയുന്നു. 56 ഇഞ്ച് നെഞ്ച് എന്താണെന്ന് അവർക്കറിയില്ലേ? ഇത് ദുർബലമായ കോൺഗ്രസ് സർക്കാരല്ല മറിച്ച് മോദിയുടെ ശക്തമായ സർക്കാരാണെന്നും മോദി പറഞ്ഞു.