തൃശൂര്: കുന്ദംകുളത്ത് വ്യാജ ഡോക്ടര് പൊലീസ് പിടിയിലായി. പൈല്സിനും ഫിസ്റ്റുലയ്ക്കും പരിഹാരം എന്ന നിലയില് വര്ഷങ്ങളായി ചികിത്സ നടത്തി വരികയായിരുന്ന അസം സ്വദേശി പ്രകാശ് മണ്ഡല് ആണ് പിടിയിലായത്.
അമ്പത്തിമൂന്നുകാരനായ പ്രകാശ് മണ്ഡല് വര്ഷങ്ങളായി കേരളത്തില് താമസിക്കുന്നയാളാണ്. പാറേമ്പാടത്ത് പ്രവര്ത്തിച്ചിരുന്ന ‘റോഷ്നി ക്ലിനിക്’ എന്ന സ്ഥാപനത്തിലാണ് പ്രതി വ്യാജ ചികിത്സ നടത്തിയിരുന്നത്.
ക്ലിനിക്കില് പൊലീസ് നടത്തിയ പരിശോധനയിലാണ് ഇയാളുടെ പക്കല് മതിയായ രേഖകളൊന്നും ഇല്ല എന്നത് കണ്ടെത്തിയത്. ഇതോടെയാണ് കുന്ദംകുളം പൊലീസ് ഇയാളെ അറസ്റ്റ് ചെയ്തത്.
ക്ലിനിക്കില് നിന്ന് ചികിത്സയ്ക്ക് ഉപയോഗിക്കുന്ന വസ്തുക്കള് പൊലീസ് കണ്ടെത്തിയിട്ടുണ്ട്. പ്രതിയെ വൈദ്യപരിശോധനയ്ക്ക് വിധേയനാക്കിയ ശേഷം കോടതിയില് ഹാജരാക്കി റിമാന്ഡ് ചെയ്തു.
