ശബരിമല: രജനീകാന്തിന്റെ 171ാമത് സിനിമയായ ‘കൂലി’യുടെ ഷൂട്ടിംഗ് ആരംഭിക്കുന്നതിന് മുന്പ് സംവിധായകന് ലോകേഷ് കനകരാജ് ശബരിഗിരീശന്റെ അനുഗ്രഹം തേടി ശബരിമലയില് എത്തി. എഴുത്തുകാരനും സംവിധായകനുമായ രത്നകുമാറും മറ്റ് രണ്ട് സിനിമാസുഹൃത്തുക്കളും കൂടെയുണ്ടായിരുന്നു.
ഇതില് രത്നകുമാറാണ് ശബരിമലയില് ലോകേഷ് കനകരാജ് നില്ക്കുന്ന ചിത്രം എക്സിലെ സമൂഹമാധ്യമപേജില് പങ്കുവെച്ചത്. കൈദി, മാസ്റ്റര്, വിക്രം, ലിയോ എന്നീ ബ്ലോക്ക് ബസ്റ്റര് സിനിമകളുടെ സംവിധായകനാണ് ലോകേഷ് കനകരാജ്. കറുപ്പുവസ്ത്രങ്ങളും രണ്ടും മൂന്നും ചുറ്റുള്ള മാലയും അണിഞ്ഞ് ഭക്തിനിര്ഭരമായ മുഖത്തോടെ ഇവര് നില്ക്കുന്ന ചിത്രമാണ് പങ്കുവെച്ചിരിക്കുന്നത്. ഇതിന് നിറയെ കമന്റുകളും ലൈക്കുകളും വരുന്നുണ്ട്.
വിജയിന്റെ ലിയോ, രജനീകാന്തിന്റെ കൂലി എന്നിവയുടെ തിരക്കഥാകൃത്തുകൂടിയായ രത്നകുമാര് അമല പോളിന്റെ ആടൈയുടെ സംവിധായകന് കൂടിയാണ്. ‘ഗ്യാങ്സ്റ്റര് സ്ക്വാഡ്’ എന്ന അടിക്കുറിപ്പോടെയാണ് ചിത്രം പങ്കുവെച്ചിരിക്കുന്നത്.
തീര്ത്ഥയാത്ര കഴിഞ്ഞ് ചെന്നൈയില് മടങ്ങിയെത്തിയാല് ഷൂട്ട് തുടങ്ങും. സണ് പിക്ചേഴ്സ് നിര്മ്മിക്കുന്ന ഈ ചിത്രത്തില് ഗുണ്ടാനേതാവായാണ് രജനീകാന്ത് വേഷമിടുന്നതെന്ന് കരുതുന്നു. 2025ല് ചിത്രം റിലീസാകും.
