തൊടുപുഴ: അന്തരീക്ഷച്ചുഴിയുടെ സ്വാധീനത്തെ തുടര്ന്ന് സംസ്ഥാനത്ത് വേനല്മഴ ശക്തമാകുന്നു. ചൂടിന് ആശ്വാസമായി മെയ് പാതിയോടെ മഴ കൂടുതല് ശക്തമാകുമെന്ന് നേരത്തെ റിപ്പോര്ട്ട് വന്നിരുന്നു. ഈ മാസം എട്ടിനാണ് വേനല് മഴ പരക്കെ ശക്തമായത്. അന്തരീക്ഷച്ചുഴികള് തുടരുന്നതിനാല് മഴയ്ക്ക് കാര്യമായ ഇടവേള ഇനിയുണ്ടാകാന് ഇടയില്ലെന്നാണ് വിദഗ്ധരുടെ വിലയിരുത്തല്. ഇന്ന് പത്തനംതിട്ട, എറണാകുളം, ഇടുക്കി, മലപ്പുറം, കോഴിക്കോട് വയനാട് ജില്ലകളിലാണ് യെല്ലോ അലര്ട്ടുള്ളത്. നാളെ പാലക്കാട്, മലപ്പുറം ജില്ലകളില് ഓറഞ്ച് അലര്ട്ടുണ്ട്. ശനിയാഴ്ച 3 ജില്ലകളിലും ഞായറാഴ്ച 7 ജില്ലകളിലും ഓറഞ്ച് അലര്ട്ടുണ്ട്. ഞായറാഴ്ച റെഡ് അലര്ട്ട് പ്രഖ്യാപിക്കാനുള്ള സാധ്യതയുണ്ട്.
മഴ കൂടുതല് വ്യാപകമായതോടെ കുറവ് 40 ശതമാനത്തിലേക്ക് താഴ്ന്നു. വടക്കന് ജില്ലകളിലാണ് മഴക്കുറവ് ഏറ്റവും കൂടുതല്. വരും ദിവസങ്ങളില് ഇതും പരിഹരിക്കപ്പെടുമെന്നാണ് പ്രതീക്ഷ. അതേസമയം തീരദേശ മേഖലകളില് ഇനിയും മഴ ശക്തമായ സാന്നിധ്യം അറിയിച്ചിട്ടില്ല. അറബിക്കടല് ചൂട് പിടിച്ച് കിടക്കുന്നതാണ് ഇതിന് പ്രധാന കാരണം.
കന്യാകുമാരി കടലിലും തെക്കന് തമിഴ്നാട് തീരത്തുമായി അന്തരീക്ഷച്ചുഴി തുടരുകയാണ്. ഇവിടെ നിന്ന് ലക്ഷദ്വീപിലേക്ക് ന്യൂനമര്ദപാത്തിയുമുണ്ട്. ഇതാണ് മഴയ്ക്ക് കാരണം. സാധാരണ ഉച്ചയ്ക്ക് ശേഷം ലഭിച്ചിരുന്ന മഴ ഇന്ന് മുതല് രാവിലെയടക്കം പെയ്യാന് ഇടയുണ്ട്. പലയിടത്തും ഇടവേളകളോടെ മഴ നീണ്ട് നിന്നേക്കും. 19, 20 തിയതികളിലാകും മഴ കൂടുതല് ശക്തമാകുക. 20ന് കൊല്ലം, പത്തനംതിട്ട, എറണാകുളം, ആലപ്പുഴ ജില്ലകളില് അതിതീവ്രമഴയ്ക്കും സാധ്യതയുണ്ട്. 21നും സമാന രീതിയില് ശക്തമായ മഴ പലയിടങ്ങളിലും ലഭിക്കും. ഇതിന് ശേഷം ശക്തി കുറയും.
കേരള തീരത്ത് മോശം കാലാവസ്ഥയ്ക്കും 55 കിമീ വരെ വേഗത്തിലുള്ള കാറ്റിനും സാധ്യതയുള്ളതിനാല് മത്സ്യ ബന്ധനത്തിന് പോകുന്നതിന് 18 മുതല് നിരോധനമുണ്ട്. ഇതിനൊപ്പം കേരള തീരത്ത് 1.2 മീറ്റര് വരെ തിരമാല ഉയരാനും സാധ്യതയുണ്ടെന്ന് കേന്ദ്ര സമുദ്രഗവേഷണ കേന്ദ്രം മുന്നറിയിപ്പ് നല്കി.
