ആലപ്പുഴ: പതിനാല് വര്‍ഷം മുന്‍പ് വിവാഹ ബന്ധം വേര്‍പെടുത്തിയവര്‍ ഏകമകളുടെ ഭാവിക്ക് വേണ്ടി വീണ്ടും ഒരുമിച്ചു. ആലപ്പുഴ കുതിരപ്പന്തി അശ്വതി നിവാസില്‍ റിട്ട, നഴ്‌സിങ് അസിസ്റ്റന്റ് സുബ്രഹ്മണ്യ (57)നും, കുതിരപ്പന്തി രാധാനിവാസില്‍ അങ്കണവാടി ജീവനക്കാരിയായ കൃഷ്‌കുമാരി (50)യുമാണ് കുടുംബകോടതി ജഡ്ജിയുടെയും, അഭിഭാഷകരുടെയും ഉപദേശങ്ങള്‍ സ്വീകരിച്ച്, മകളുടെ നല്ല ഭാവിയെ കരുതി വീണ്ടും വിവാഹിതരാകാന്‍ തീരുമാനിച്ചത്.
ഒരിക്കല്‍ വേര്‍പിരിഞ്ഞ അതേ കോടതി വരാന്തയില്‍ സുബ്രഹ്മണ്യനും കൃഷ്ണകുമാരിയും ജീവിതം തിരികെ പിടിച്ചപ്പോള്‍ സാക്ഷിയായി 15 വയസുകാരിയായ മകള്‍ അഹല്യയും ഒപ്പമുണ്ടായിരുന്നു. 2006 ആഗസ്ത് 31നായിരുന്നു ഇവരുടെ വിവാഹം. 2008ലാണ് മകള്‍ ജനിച്ചത്. നിസാരപ്രശ്‌നത്തില്‍ വഴക്കിട്ട ഇരുവരും അകന്നുജീവിക്കാന്‍ തുടങ്ങിയതോടെ കേസ് കോടതിയിലെത്തി. 2010 മാര്‍ച്ച് 29ന് നിയമപരമായി വിവാഹബന്ധം വേര്‍പെടുത്തി.
സുബ്രഹ്മണ്യന് പിന്നീട് കൃഷ്ണകുമാരിക്കും, മകള്‍ക്കും നല്കാനുള്ള മുഴുവന്‍ സാമ്പത്തിക ബാദ്ധ്യതകളും തീര്‍ത്തു, ഇരുവരും സംയുക്തമായി കരാറും തയാറാക്കി. എന്നാല്‍ കൃഷ്ണകുമാരി മകള്‍ക്ക് ജീവനാംശം ആവശ്യപ്പെട്ട് വീണ്ടും കുടുംബകോടതിയെ സമീപിച്ചു.
രണ്ടായിരം രൂപ വീതം പ്രതിമാസം ജീവനാംശം നല്കാന്‍ കോടതി ഉത്തരവായി. ഇതിനെതിരെ സുബ്രഹ്മണ്യന് ഹൈക്കോടതിയെ സമീപിച്ചു. സുപ്രീംകോടതിയുടെ മുന്‍ ഉത്തരവുകള്‍ ചൂണ്ടിക്കാട്ടി ഹൈക്കോടതി ഹര്‍ജി തള്ളി. പ്രായപൂര്‍ത്തിയാകാത്ത മകളുടെ ജീവനാംശം മാതാപിതാക്കള്‍ക്ക് കരാറിലൂടെ ഇല്ലാതാക്കാന്‍ കഴിയില്ലെന്ന് ഹൈക്കോടതി വ്യക്തമാക്കി.
ഇതിന്റെ അടിസ്ഥാനത്തില്‍ ജീവനാംശം ലഭിക്കാനായി കൃഷ്ണകുമാരി വീണ്ടും കുടുംബകോടതിയെ സമീപിക്കുകയായിരുന്നു. കുടുംബകോടതി ജഡ്ജി വിദ്യാധരന്‍ കേസ് ചേംബറില്‍ പരിഗണിച്ചു. ഇരുവരും പുനര്‍വിവാഹിതരല്ലാത്തതിനാല്‍ മകളുടെ ഭാവിയെ കരുതി പ്രശ്‌നങ്ങള്‍ രമ്യമായി പരിഹരിച്ച് ഒന്നിച്ചു കഴിയാന്‍ നിര്‍ദേശിച്ചു. ഇരുകക്ഷികളും നിര്‍ദേശം അംഗീകരിക്കുകയും, കുട്ടിയോടൊപ്പം ഒരുമിച്ച് കഴിയാനും തീരുമാനിച്ചു. പുനര്‍വിവാഹം രജിസ്റ്റര്‍ ചെയ്യാനുള്ള അപേക്ഷ കോടതിയില്‍ സമര്‍പ്പിച്ചായിരുന്നു മടക്കം.
കളര്‍കോട് അഞ്ജലി ഓഡിറ്റോറിയത്തിനുസമീപത്തെ വാടകവീട്ടിലാകും ഇനിയുള്ള താമസം. സുബ്രഹ്മണ്യന് വേണ്ടി അഭിഭാഷകരായ ആര്‍. രാജേന്ദ്രപ്രസാദ്, വിമി. എസ്, സുനിത. ജി എന്നിവരും, കൃഷ്ണകുമാരിക്ക് വേണ്ടി അഡ്വ. സൂരജ് ആര്‍. മൈനാഗപ്പള്ളിയും ഹാജരായി.
പ്രതികരിക്കാൻ ഇവിടെ എഴുതുക: