കോഴിക്കോട് : അമീബിക് മസ്തിഷ്കജ്വരമെന്ന സംശയം മൂലം നിരീക്ഷണത്തിലായിരുന്ന നാല് കുട്ടികളുടെയും പരിശോധന ഫലം നെഗറ്റീവ്. രോഗ ബാധയേറ്റ മുന്നിയൂര് സ്വദേശിനി അഞ്ച് വയസുകാരിക്കൊപ്പം കടലുണ്ടി പുഴയിലെ അതേ കടവില് കുളിച്ച കുട്ടികളുടെ പരിശോധനാ ഫലമാണ് നെഗറ്റീവായത്.രണ്ട് ദിവസം മുമ്പാണ് ഈ കുട്ടികളെ ആശുപത്രിയില് പ്രവേശിപ്പിച്ചത്. രോഗലക്ഷണങ്ങള് ഇവരിലുണ്ടായിരുന്നു.
അതേസമയം അഞ്ച് വയസുകാരി അതീവ ഗുരുതരാവസ്ഥയില് വെന്റിലേറ്ററിലാണ്. മലപ്പുറം കടലുണ്ടി പുഴയില് നിന്നാണ് വൈറസ് ബാധയേറ്റതെന്നാണ് കരുതുന്നത്.
കടുത്ത തലവേദനയും പനിയും കാരണം കുട്ടിയെ സമീപത്തെ സ്വകാര്യ ആശുപത്രിയില് പ്രവേശിപ്പിച്ചെങ്കിലും രോഗം ഗുരുതരമായതോടെ കോഴിക്കോട് മെഡിക്കല് കോളേജ് ആശുപത്രിയിലേക്ക് മാറ്റി.നട്ടെല്ലില് നിന്നുളള സ്രവം പരിശോധിച്ചപ്പോഴാണ് അമീബിക് മസ്തിഷ്ക ജ്വരം സ്ഥിരീകരിച്ചത്. കുട്ടി പുഴയിലിറങ്ങിയ അതേ ദിവസം പുഴയില് കുളിച്ച ആളുകളുടെ വിവരം ശേഖരിക്കുന്നുണ്ട്. പാറക്കല് കടവില് കുളിച്ചവര്ക്ക് ആരോഗ്യപ്രശ്നമുണ്ടെങ്കില് ഉടന് ചികിത്സ തേടണമെന്ന് ആരോഗ്യവകുപ്പ് അറിയിച്ചു.
അഞ്ച് വയസുകാരിക്ക് അമീബിക് മസ്തിഷ്ക ജ്വരം ബാധിച്ച സാഹചര്യത്തില് മലപ്പുറം മുന്നിയൂരിലെ പുഴയില് കുളിക്കുന്നതിനും നിയന്ത്രണം ഏര്പ്പെടുത്തി. മേഖലയിലെ അഞ്ചു കടവുകളില് ഇറങ്ങുന്നതിനാണ് പഞ്ചായത്ത് അധികൃതര് നിയന്ത്രണം ഏര്പ്പെടുത്തിയത്.
