ചെന്നൈ: നടനും മക്കൾ നീതി മയ്യം നേതാവുമായ കമൽഹാസൻ സിനിമാരംഗത്തുള്ളവര്ക്ക് നല്കിയ വിരുന്നിൽ കൊക്കെയ്ൻ ഉപയോഗിച്ചെന്ന ആരോപണം ശക്തമാവുന്നു. ഇതേക്കുറിച്ച് അന്വേഷിക്കണമെന്ന ആവശ്യവുമായി മുന്നോട്ട് വന്നിരിക്കുകയാണ് ബിജെപി.
തമിഴ്നാട് ബി.ജെ.പി. സംസ്ഥാന വൈസ് പ്രസിഡന്റ് നാരായണൻ തിരുപ്പതി ഇക്കാര്യത്തില് അന്വേഷണം ആവശ്യപ്പെട്ടിരിക്കുന്നത്. തമിഴ് ഗായിക സുചിത്രയാണ് ഈയിടെ നല്കിയ അഭിമുഖത്തില് ഇത്തരമൊരു വെളിപ്പെടുത്തല് നടത്തിയത്. തമിഴ് സിനിമാലോകം മയക്കുമരുന്നിന്റെ പിടിയിലായി ദിശതെറ്റുകയാണെന്നും അവർ ആരോപിച്ചിരുന്നു.
‘സുചിത്ര പറഞ്ഞ കാര്യങ്ങളിൽ ഗൗരവമായ അന്വേഷണം നടത്തണം. തെറ്റായ വിവരങ്ങളാണ് നൽകിയതെങ്കിൽ സുചിത്രയ്ക്കെതിരേ നടപടിയെടുക്കണം. ആരോപണത്തിൽ ഏതെങ്കിലും തരത്തിലുള്ള അടിസ്ഥാനമുണ്ടെങ്കിൽ കമൽഹാസനെ ചോദ്യംചെയ്യണം. പാർട്ടികളിലേക്ക് എവിടെനിന്നാണ് മയക്കുമരുന്ന് എത്തിക്കുന്നതെന്ന് കണ്ടെത്തണം’’ -നാരായണ് തിരുപ്പതി ആവശ്യപ്പെട്ടു.
