പത്തനംതിട്ട: ഇടവമാസ പൂജകള്ക്കും പ്രതിഷ്ഠാ ദിനാഘോഷത്തിനുമായി ശബരിമല അയ്യപ്പസന്നിധി നാളെ തുറക്കും. വൈകിട്ട് അഞ്ചിന് തന്ത്രി കണ്ഠര് മഹേഷ് മോഹനരുടെ സാന്നിധ്യത്തില് മേല്ശാന്തി പി.എന്. മഹേഷ് നമ്പൂതിരി നടതുറന്ന് ദീപം തെളിയിക്കും. മാളികപ്പുറത്ത് മേല്ശാന്തി പി.എന്. മുരളി നമ്പൂതിരി നടതുറക്കും.
തുടര്ന്ന് പതിനെട്ടാം പടിക്ക് മുന്നിലായുള്ള മഹാ ആഴിയിലേക്ക് അഗ്നി പകരും. ഇതോടെ അയ്യപ്പഭക്തര് പടി ചവിട്ടി ദര്ശനം നടത്തും. 15ന് പുലര്ച്ചെ പതിവ് പൂജകളും അഭിഷേകവും നെയ്യഭിഷേകവും ആരംഭിക്കും. 18നാണ് പ്രതിഷ്ഠാ ദിനാഘോഷം. പൂജകള് പൂര്ത്തിയാക്കി 19ന് രാത്രി 10ന് നട അടയ്ക്കും.
