പത്തനംതിട്ട: ജസ്‌ന തിരോധാന കേസുമായി ബന്ധപ്പെട്ട് ഇപ്പോഴും ഊമക്കത്തുകള്‍ വരുന്നുണ്ടെന്ന് പിതാവ് ജെയിംസ്.സിബിഐ അന്വേഷണത്തില്‍ വീഴ്ച ഇല്ലെങ്കിലും അന്വേഷണം വഴിതെറ്റിക്കാന്‍ പല ഘട്ടത്തിലും ശ്രമമുണ്ടായെന്ന് അദ്ദേഹം പറഞ്ഞു.
മകളെ അപായപ്പെടുത്തി എന്നാണ് സംശയിക്കുന്നത്. ഇക്കാര്യത്തില്‍ രണ്ട് പേരെയാണ് സംശയിക്കുന്നത്. തന്റെ അന്വേഷണത്തില്‍ കണ്ടെത്തിയ തെളിവുകള്‍ കോടതിക്ക് കൈമാറി.പുനരന്വേഷണത്തില്‍ വലിയ പ്രതീക്ഷയാണുളളതെന്നും ജെയിംസ് പ്രതികരിച്ചു.
താന്‍ നല്‍കിയ വിവരങ്ങള്‍ രഹസ്യമായി സൂക്ഷിക്കണമെന്ന് കോടതിയോട് ആവശ്യപ്പെട്ടിട്ടുണ്ട്. ജസ്‌ന തിരോധാന കേസില്‍ പുനരന്വേഷണം ആവശ്യപ്പെട്ട് സമര്‍പ്പിച്ച ഹര്‍ജി പരിഗണിച്ച തിരുവനന്തപുരം സിജെഎം കോടതി അനുകൂല ഉത്തരവ് പുറപ്പെടുവിച്ച ശേഷം പ്രതികരിക്കുകയായിരുന്നു ജസ്‌നയുടെ പിതാവ്.
സിബിഐ അന്വേഷണത്തില്‍ കണക്കിലെടുക്കാത്ത ചില തെളിവുകള്‍ ജെയിംസ് കഴിഞ്ഞ ദിവസം കോടതിയില്‍ സമര്‍പ്പിച്ചിരുന്നു. ലോക്കല്‍ പൊലീസും ക്രൈംബ്രാഞ്ചും സിബിഐയും അന്വേഷിച്ചിട്ടും ജസ്‌നയെ കുറിച്ച് ഒരു കാര്യവും കണ്ടെത്താന്‍ കഴിഞ്ഞിരുന്നില്ല.തുടര്‍ന്ന് കേസ് അവസാനിപ്പിക്കാന്‍ കോടതിയില്‍ ആവശ്യപ്പെട്ട സി ബി ഐയെ എതിര്‍ത്ത് ഹര്‍ജി സമര്‍പ്പിക്കുകയായിരുന്നു ജെയിംസ്. കുടുംബത്തിന് പുതിയ ചില തെളിവുകള്‍ ലഭിച്ചിട്ടുണ്ടെന്ന് പിതാവ് അച്ഛന്‍ കോടതിയെ അറിയിച്ചിരുന്നു. മുദ്രവച്ച കവറിലാണ് ജെയിംസ് തെളിവുകള്‍ ഹാജരാക്കിയത്.
പ്രതികരിക്കാൻ ഇവിടെ എഴുതുക: