മ്യൂണിക്ക്: ജര്‍മന്‍ ബുന്ദസ് ലിഗയില്‍ തകര്‍പ്പന്‍ വിജയവുമായി ചാമ്പ്യന്മാരായ ബയര്‍ ലെവര്കുസന്. എന്‍ട്രാക്റ്റ് ഫ്രാങ്ക്ഫുര്‍ട്ടിനെ ഒന്നിനെതിരെ അഞ്ച് ഗോളുകള്‍ക്ക് തകര്‍ത്തു.
ലീഗില്‍ ഈ സീസണില്‍ 32 മത്സരങ്ങള്‍ പൂര്‍ത്തിയാക്കിയ ലെവര്കുസന് ഒരു കളിയില്‍ പോലും തോറ്റിട്ടില്ല. അപരാജിത കുതിപ്പ് നടത്തിയ അവര്‍ 26-ല്‍ ജയിച്ചപ്പോള്‍ ആറില്‍ സമനില പാലിച്ചു. 32 കളികളില്‍ നിന്ന് 84 പോയിന്റാണ് അവര്‍ക്കുള്ളത്. മാത്രമല്ല ഈ സീസണില്‍ എല്ലാ കളികളിലുമായി 48 മത്സരങ്ങളാണ് അവര്‍ തോല്‍ക്കാതെ പൂര്‍ത്തിയാക്കിയത്. രണ്ടാമതുള്ള ബയേണ്‍ മ്യൂണിക്കിന് അത്രയും കളികളില്‍ നിന്ന് 69 പോയിന്റും.
ഫ്രാങ്ക്ഫര്‍ട്ടിനെതിരായ കളിയില്‍ 12-ാം മിനിറ്റില്‍ ഗ്രാനിറ്റ് ഷാക്കയിലൂടെയാണ് അവര്‍ ഗോളടിക്ക് തുടക്കമിട്ടത്. എന്നാല്‍ 32-ാം മിനിറ്റില്‍ ഹ്യൂഗോയിലൂടെ ഫ്രാങ്ക്ഫര്‍ട്ട് സമനില പിടിച്ചു. പിന്നീട് അവര്‍ കളത്തിലേയില്ലാതായി. 44-ാം മിനിറ്റില്‍ പാട്രിക് ഷിക്ക്, 58-ാം മിനിറ്റില്‍ പെനാല്‍റ്റിയിലൂടെ പലാസിയോസ്, 77-ാം മിനിറ്റില്‍ ജെര്‍മി ഫ്രിംഫോങ്, 89-ാം മിനിറ്റില്‍ പെനാല്‍റ്റിയിലൂടെ ബോണിഫെയ്‌സ് എന്നിവരും ലെവര്‍കുസനായി ലക്ഷ്യം കണ്ടു.
