അമ്പലപ്പുഴ: കായംകുളം -പുനലൂര്‍ സംസ്ഥാന പാതയില്‍ അപകടകരമായ രീതിയില്‍ കാറില്‍ അഭ്യാസപ്രകടനം നടത്തിയ സംഭവത്തില്‍ ശിക്ഷാ നടപടിയുടെ ഭാഗമായി യുവാക്കളുടെ സാമൂഹിക സേവനം ആരംഭിച്ചു.
ആലപ്പുഴ മെഡിക്കല്‍ കോളജ് ആശുപത്രിയിലാണ് സന്നദ്ധ സേവനം ആരംഭിച്ചത്. അഞ്ച് യുവാക്കളും ഇന്നലെ രാവിലെയോടെ ആശുപത്രിയിലെത്തി. ഉച്ചയ്‌ക്ക് രണ്ടു വരെ സര്‍ജറി, മെഡിസിന്‍ അത്യാഹിത വിഭാഗത്തിലാണ് അഞ്ചുപേരും ജോലി ചെയ്തത്. രോഗികളെ പരിചരിക്കല്‍, അവര്‍ക്കാവശ്യമായ സഹായം ചെയ്യല്‍, രോഗികളെ വീല്‍ച്ചെയറിലും സ്‌ട്രെച്ചറിലുമായി വാര്‍ഡുകളിലേക്ക് മാറ്റല്‍ എന്നിവയാണ് ജോലികള്‍.
ആദിക്കാട്ടുകുളങ്ങര സ്വദേശി അല്‍ഗാലിബ്ബിന്‍ നസീര്‍, കൊല്ലം ശാസ്താംകോട്ട പോരുവഴി സ്വദേശികളായ അഫ്ത്താര്‍ അലി, സജാസ്, ശൂരനാട് സ്വദേശി ബിലാല്‍ നസീര്‍, നൂറനാട് ആദിക്കാട്ടുകുളങ്ങര സ്വദേശി മുഹമ്മദ് നജാദ് എന്നിവര്‍ക്കെതിരെയാണ് നടപടി. കാറോടിച്ചിരുന്ന അല്‍ഗാലിബ്ബിന്‍ നസീറിന്റെ ലൈസന്‍സ് ഓരാഴ്ചത്തേക്ക് സസ്‌പെന്‍ഡ് ചെയ്തിരുന്നു. ഇവര്‍ ഒരാഴ്ചത്തേക്ക് സാമൂഹ്യ സേവനം നടത്തണമെന്നാണ് മോട്ടോര്‍ വാഹന വകുപ്പിന്റെ നിര്‍ദേശം. മാവേലിക്കര ജോ.ആര്‍ടിഒ എം.ജി മനോജ് ആണ് യുവാക്കള്‍ക്ക് നല്ലനടപ്പിന് കമ്യൂണിറ്റി സര്‍വീസ് ശിക്ഷ നല്‍കിയത്. നാലു ദിവസത്തെ മെഡിക്കല്‍ കോളജിലെ സേവനത്തിനുശേഷം പത്തനാപുരം ഗാന്ധിഭവനില്‍ മൂന്ന് ദിവസത്തേ സേവനവും ചെയ്യണം.
ഏപ്രില്‍ 28ന് കല്യാണത്തിനു പങ്കെടുത്തു മടങ്ങി വരും വഴിയാണ് കാറില്‍ ഇവര്‍ അഭ്യാസപ്രകടനം നടത്തിയത്. ഇവര്‍ക്ക് പിന്നാലെ വന്ന വാഹന യാത്രക്കാര്‍ രംഗം പകര്‍ത്തി നവ മാധ്യമങ്ങളില്‍ പോസ്റ്റു ചെയ്തു. ഇതോടെ വിഡിയോ പ്രചരിക്കുകയും മോട്ടോര്‍ വാഹന വകുപ്പിന്റെ ശ്രദ്ധയില്‍പ്പെടുകയും ചെയ്തത്. പിന്നാലെ ആര്‍ടിഒ ഉദ്യോഗസ്ഥര്‍ കാര്‍ കസ്റ്റഡിയിലെടുക്കുകയും യുവാക്കള്‍ക്കെതിരെ നടപടി എടുക്കുകയും ചെയ്തിരുന്നു. യുവാക്കളുടെ വീട്ടുകാരുമായി നടത്തിയ ചര്‍ച്ചയിലാണ് സന്നദ്ധ സേവനം നല്‍കി മാതൃകാപരമായ ശിക്ഷ നല്‍കാന്‍ മോട്ടോര്‍ വാഹന വകുപ്പ് തീരുമാനിച്ചത്.
പ്രതികരിക്കാൻ ഇവിടെ എഴുതുക: