ന്യൂദല്ഹി: കോണ്ഗ്രസ് ഉടന് പിളരുമെന്ന് ആചാര്യ പ്രമോദ് കൃഷ്ണം. അമേഠി വിട്ട് റായ്ബറേലിയില് മത്സരിക്കാന് തീരുമാനിച്ച രാഹുലിനെതിരെ രൂക്ഷവിമര്ശനം ഉന്നയിച്ചതിന് പിന്നാലെയാണ് കോണ്ഗ്രസ് ഉടന് പിളരുമെന്ന പ്രസ്താവനയുമായി മുന് കോണ്ഗ്രസ് നേതാവ് കൂടിയായ അദ്ദേഹം രംഗത്ത് എത്തിയത്.
കോണ്ഗ്രസ് രാഹുല് വിഭാഗമായും പ്രിയങ്ക വിഭാഗമായും പിളരുമെന്ന് ആചാര്യ പ്രമോദ് കൃഷ്ണം പറഞ്ഞു. പ്രിയങ്കയെ തെരഞ്ഞെടുപ്പില് മത്സരിക്കാന് അനുവദിക്കാത്തതില് അവരുടെ അനുയായികളില് കനത്ത അമര്ഷമുണ്ട്. അവരുടെയുള്ളില് ഒരു അഗ്നിപര്വ്വതം രൂപം കൊള്ളുകയാണ്. ജൂണ് നാലിന് ഈ അഗ്നിപര്വ്വതം പൊട്ടിത്തെറിക്കും. ഇതോടെ കോണ്ഗ്രസ് രാഹുല്, പ്രിയങ്ക വിഭാഗങ്ങളായി പിളരും.
രാഹുല് അമേഠി വിട്ടുപോയതോടെ കോണ്ഗ്രസ് പ്രവര്ത്തകരുടെ മനോവീര്യം കുറഞ്ഞു. പാകിസ്ഥാനില് രാഹുലിന്റെ ജനപ്രീതിയും ആവശ്യവും വര്ധിച്ചുകൊണ്ടിരിക്കുന്നതിനാല് അദ്ദേഹം റായ്ബറേലിക്ക് പകരം റാവല്പിണ്ടിയില് നിന്ന് മത്സരിക്കണമെന്നാണ് തന്റെ അഭിപ്രായമെന്നും അദ്ദേഹം തുറന്നടിച്ചു.
കോണ്ഗ്രസില് നടക്കുന്ന ഗൂഢാലോചനയുടെ ഇരയാണ് പ്രിയങ്കയെന്നും അദ്ദേഹം ആരോപിച്ചു. പ്രിയങ്കയെ തെരഞ്ഞെടുപ്പില് മത്സരിപ്പിക്കാന് രാഹുല് അനുവദിക്കില്ലെന്ന് താന് നേരത്തെ തന്നെ പറഞ്ഞിരുന്നു. പ്രിയങ്കക്കെതിരെ കുടുംബത്തിലും പാര്ട്ടിയിലും വലിയ ഗൂഢാലോചന നടക്കുന്നുണ്ട്. കുടുംബത്തിലും പാര്ട്ടിയിലും നടന്ന ഗൂഢാലോചനയുടെ ഇരയാണ് അവരെന്നും അദ്ദേഹം കൂട്ടിച്ചേര്ത്തു. അയോദ്ധ്യയിലെ പ്രാണപ്രതിഷ്ഠയുമായി ബന്ധപ്പെട്ട് കോണ്ഗ്രസ് സ്വീകരിച്ച നിലപാടിനെതിരെ പ്രതികരിച്ചതിനാണ് ആചാര്യ പ്രമോദ് കൃഷ്ണയ്ക്കെതിരെ പാര്ട്ടി നടപടി സ്വീകരിച്ചത്.
